Vegna þess hve orkan er ódýr hafa margir nefnt að það Íslendingar séu eyðsluseggir á rafmagn þar sem þeir haldi að þeir þurfi ekki að spara rafmagnið.

Á heimilum er hægt að spara rafmagn með ýmsum hætti. Slökkva má á tækjum eða ljósum sem ekki er verið að nota.

Þegar við notum raftæki getum við líka sparað rafmagn með ýmsum hætti. Þegar matur er eldaður á eldavélarhellu er mikilvægt að velja hellu sem er jafn stór og potturinn. Ef við veljum hellu sem er of stór fer mikið af orku til spillis, því hún nær alls ekki til pottsins.

Þegar við sjóðum vatn eða eldum mat er líka mikilvægt að setja lok á pottinn eða pönnuna. Það er gert til þess að hitinn nýtist sem best í pottinum. Þegar bakarofninn er notaður er slæmt að opna hann að óþörfu. Við það lækkar hitinn í ofninum.

Á næstum öllum heimilum eru raftæki sem nota rafmagn þó við séum ekki að nota tækin. Heima hjá ykkur skuluð þið athuga hvort þið sjáið ekki ljós á sumum raftækjum sem eru ekki í notkun. Þetta eru tæki eins og sjónvörp, afruglarar, myndbandstæki, DVD tæki, tölvur og tölvuskjáir. Ljósin sem loga á tækjunum sýna að þau eru í viðbragðsstöðu og hægt er að nota t.d. fjarstýringu til að kveikja á þeim. Við athuganir á orkunotkun heimila hefur komið í ljós að tæki í viðbragðsstöðu nota um 10 til 15% af öllu rafmagninu á heimilinu.

Oft má finna ýmsa möguleika til að spara raforku sem notuð er til lýsingar á heimilum. Við getum gengið um heima hjá okkur og kannað hvort ljós séu kveikt að óþörfu. Er til dæmis kveikt á ljósum í stofunni án þess að þar sé nokkur maður?

Við getum líka kannað hvort það borgi sig að fá setja orkusparnaðarljós í stað venjulegra glóðarpera. Glóðarperur gefa ekki einungis frá sér birtu, heldur nota þær líka rafmagnið til þess að búa til hita. Sparnaðarljósaperur gefa hins vegar frá sér lítinn hita og nota rafmagnið nær eingöngu til lýsingar. 15 W sparnaðarljósapera er sambærileg við 60 W glóðarperu. Það er því fjórfaldur munur á orkunotkuninni. Sparnaðarperur endast einnig 8 sinnum lengur en glóðarperur.

Mörg raftæki sem nú eru framleidd eyða mun minna rafmagni en þau sem framleidd voru fyrir 15 árum síðan. Orkunýting raftækjanna er sífellt að batna. Þannig getur fjárfesting í nýjum ísskáp, frysti eða skilað sér á nokkrum árum.

Ef ísskápurinn er rangt stilltur á of mikla kælingu má búast við því að hann noti of mikið rafmagn. Það er óþarfi að hafa ísskápinn allt of kalt stilltan. Miðað er við að ísskápar séu stillir á 5 gráður á C. Hægt er að ganga úr skugga um að rétt hitastig sé í ísskápnum með hitamæli. Við það að opna og loka hurðina á ísskápnum hleypum við hlýju lofti inn í hann sem ísskápurinn þarf að eyða orku í að kæla niður. Þess vegna ættum við ekki að opna ísskápa að óþörfu.

Við getum líka athugað ýmsar venjur á heimilinu og kannað hvort við getum ekki sparað rafmagn með því að breyta um venjur. Það má t.d. athuga hvort hægt er að þvo þvott á lægra hitastigi og sleppa jafnvel forþvotti. Ef þurrkari er á heimilinu má athuga hvort hægt er að nota hann minna með því að hengja upp þvottinn á snúrur.

Það má athuga hvort ekki er hægt að spara rafmagn í skólanum. Það má velja nemanda eða skipa hóp sem hefur eftirlit með rafmagnsnotkuninni og kannar hvernig má spara rafmagn.

Fréttayfirlit Prenta síðu