Landsvirkjun fékk vottun samkvæmt ISO 9001 staðlinum í janúar 2006 og markaði sú vottun upphafið að innleiðingu á samþættu stjórnkerfi fyrirtækisins. Undir gæðastjórnun falla einnig rafmagnsöryggismál og hefur skjalsett kerfi verið notað í nokkur ár samkvæmt kröfum Mannvirkjastofnunar um rafmagnsöryggisstjórnun rafveitna. Eftir að breytt raforkulög tóku gildi árið 2005 hefur gæðastjórnun hlotið meira vægi í starfsemi Landsvirkjunar.

Upplýsingasvið Landsvirkjunar fékk vottun samkvæmt ISO 27001 árið 2007. Sviðið hefur markað upplýsingaöryggisstefnu og metur nú öryggi gagna og kerfa til að lágmarka áhættuna.

Fyrirtæki með ISO 14001 vottun hefur farið í gegnum ferli sem felur í sér stefnumótun á sviði umhverfismála og ítarlega skoðun á hvaða umhverfisáhrif starfsemi fyrirtækisins hefur. Landsvirkjun setur sér markmið um hvernig megi draga úr mikilvægum umhverfisáhrifum starfseminnar en í staðlinum eru kröfur um að markmiðum sé náð og að sífelldar úrbætur eigi sér stað.

Fyrirtæki sem starfa samkvæmt OHSAS 18001 staðlinum þurfa sífellt að vinna að umbótum á öryggi, heilsu og vellíðan starfsfólks. Staðallinn á meðal annars að tryggja að öryggis- og heilbrigðismál séu órjúfanlegur þáttur í matsog ákvörðunarferli við fjárfestingar, framkvæmdir, rekstur og kaup á vöru og þjónustu Landsvirkjunar.

Þýska vottunarstofan TÜV SÜD hefur vottað raforkuvinnslu Landsvirkjunar sem græna raforkuvinnslu.

Löggildingarstofa hefur vottað að Landsvirkjun hafi komið sér upp innri öryggisstjórnun á orkusviði.

Landsvirkjun hlaut Íslensku gæðaverðlaunin í nóvember 2007. Markmiðið með Íslensku gæðaverðlaununum er að veita fyrirtækjum og stofnunum viðurkenningu fyrir raunverulegan stjórnunarárangur og jafnframt hvetja fyrirtæki til að setja sér skýr markmið og leggja mat á árangurinn reglulega.