Áhættustýring

Stjórn Landsvirkjunar setur stefnu varðandi áhættustýringu þar sem skilgreind eru ásættanleg áhættumörk í hverjum áhættuflokki fyrir sig.

Ákvarðanataka og eftirlit með framkvæmd áhættustýringar er í höndum áhættustjórnar en í henni sitja forstjóri, staðgengill forstjóra og framkvæmdastjóri fjármálasviðs. Forstjóri er formaður áhættustjórnar.

Dagleg áhættustýring er í höndum yfirmanns áhættustýringar. Meginhlutverk áhættustýringar er að greina og stýra áhættu Landsvirkjunar í þeim tilgangi að treysta rekstrarafkomu og sjóðstreymi félagsins. Áhættustýring sendir reglulega frá sér yfirlit til áhættustjórnar og stjórnar Landsvirkjunar þar sem áhætta félagsins og árangur af áhættustýringu er metinn.

Fjárhagsleg áhætta Landsvirkjunar

Með virkri áhættustýringu er reynt að draga úr óvissu í bæði sjóðstreymi og efnahag félagsins. Áhætta skapast við óhagstæða þróun fjárhagslegra áhættuþátta sem skilgreindir hafa verið sem breytingar á heimsmarkaðsverði á áli, vaxtaáhætta, gjaldmiðlaáhætta og lausafjáráhætta.

Mótaðilaáhætta telst einnig til fjárhagslegrar áhættu Landsvirkjunar en áhætta vegna mótaðila í samningum hefur verið takmörkuð með kröfum félagsins um gæði þeirra.

Álverðsáhætta

Álverðsáhætta Landsvirkjunar er skilgreind sem sú áhætta að álverð þróist á óhagstæðan hátt fyrir félagið sem leiði til fjárhagslegs taps, en meirihluti stóriðjusamninga félagsins eru tengdir álverði.  Stýring álverðsáhættu felur í sér sveiflujöfnun afkomu og sjóðstreymis með notkun afleiðusamninga í samræmi við heimildir og langtímamarkmið félagsins.

Vaxtaáhætta

Vaxtaáhætta er sú áhætta að fé tapist vegna breytinga á vaxtakjörum. Landsvirkjun býr við vaxtaáhættu vegna vaxtaberandi eigna og skulda, en fjárskuldir eru mun hærri en vaxtaberandi fjáreignir. Áhætta Landsvirkjunar í þeim tilfellum sem um fasta vexti er að ræða er falin í því að vextir geta lækkað í framtíðinni og félagið verði því að bera hærri fjármagnskostnað en ella. Í tilfelli fjármálagerninga með breytilega vexti er áhættan fólgin í því að vextir hækki. Meirihluti lána félagsins er með breytilega vexti og er áhættan því að mestu bundin við mögulega hækkun vaxta.

Gjaldmiðlaáhætta

Gjaldmiðlaáhætta er sú áhætta að fé tapist vegna óhagstæðra breytinga á gengi gjaldmiðla. Við mat á gjaldmiðlaáhættu hjá Landsvirkjun er horft til greiðsluáhættu og uppgjörsáhættu.

• Greiðsluáhætta félagsins er fólgin í mögulegri lækkun tekna eða hækkun gjalda vegna óhagstæðrar þróunar á gengi gjaldmiðla, gengistapi af fjárfestingum eða sölu eigna og afborgunum af lánum í annarri mynt en Bandaríkjadal.
• Uppgjörsáhætta Landsvirkjunar felst í misvægi eigna og skulda eftir myntum og áhrifin af breytingum á gengi mynta á stöðu efnahagsreikningsins.

Lausafjáráhætta

Lausafjáráhætta er skilgreind sem sú áhætta að of lítið laust fé sé í félaginu til að standa við greiðsluskuldbindingar á réttum tíma. Stýring lausafjáráhættu felur í sér að nægt lausafé sé til staðar á hverjum tíma til að standa undir öllum fjárskuldbindingum félagsins og að sem best jafnvægi sé á milli skuldbindinga og vænts greiðslustreymis.

Senda grein