Styrkir til meistaranáms í vistvænni orkunýtingu með sérhæfingu í vatnsafli
Í boði eru styrkir til meistaranáms í endurnýjanlegum orkugjöfum (MSc in Renewable Energy Science) við RES – Orkuskólann. Styrkirnir eru veittir af Landsvirkjun og nema fullum skólagjöldum þeirra sem hyggja á sérhæfingu á vatnsaflsbraut við RES skólaárið 2010 - 2011.
RES býður upp á eins árs alþjóðlegt meistaranám (90 ECTS) í vistvænni orkunýtingu og endurnýjanlegum orkugjöfum. Námið er ætlað nemendum sem hafa lokið BSc námi í verkfræði, raungreinum eða sambærilegum greinum. Boðið er upp á meistaranámið í nánu samstarfi við Háskólann á Akureyri og Háskóla Íslands, sem útskrifa nemendur skólans og veita hina formlegu meistaragráðu. Námsárið hefst í febrúar 2010 og verður boðið upp á sérhæfingu á fimm námsbrautum: Jarðhitaorku, Efnarafölum og vetnisorku, Lífmassaorku og vistvænu eldsneyti, Vatnsafli og Orkukerfum og orkustjórnun.
Við RES stunda nú um 40 nemendur meistaranám á fjórum námsbrautum frá fjórtán þjóðlöndum. Mikil áhersla er lögð á að námið sé alþjóðlegt og fer öll kennsla fram á ensku, auk þess sem stór hluti kennara við skólann kemur frá erlendum háskólum. Meistaranemar skólans vinna rannsóknarverkefni sín í tengslum við íslensk orkufyrirtæki eða erlenda samstarfsháskóla og rannsóknastofnanir.
RES – Orkuskólinn býður upp á fyrsta flokks aðstöðu í alþjóðlegu námsumhverfi.
Tenglar:
Frekari upplýsingar um samning Landsvirkjunar og RES orkuskóla >>
Nánari upplýsingar um RES orkuskóla >>