Sérfræðingar Landsvirkjunar kynntu niðurstöður jarðhitarannsókna á Bali
Á heimsþingi alþjóða jarðhitasambandsins á Bali í Indónesíu voru fjölmargar rannsóknir kynntar og yfir tuttugu fyrirlestrar haldnir um íslensk orkumál.
World Geothermal Congress 2010 var haldin á eyjunni Balí í Indónesíu dagana 25.-30. apríl síðastliðinn. Ráðstefnan var afar umfangsmikil og voru alls kynnt um 1050 erindi, þar af um 650 með fyrirlestrum. Starfsmenn Landsvirkjunar Power fluttu 4 erindi um jarðhitaverkefni Landsvirkjunar, en voru þess utan meðhöfundar af tugum annarra erinda. Af þeim verkefnum sem tengjast starfsemi Landsvirkjunar bar mest á erindum þar sem djúpborunarverkefnið og rannsóknir á jarðhitasvæðunum á Norðausturlandi komu við sögu.
Forseti Íslands, Ólafur Ragnar Grímsson, hélt erindi við setningu heimsþingsins
Ráðstefnan World Geothermal Congress er haldin á fimm ára fresti og er stærsti viðburður af þessu tag á sviði jarðhitarannsókna. Hún er sótt af vísindamönnum, verkfræðingum, tæknifræðingum, ráðamönnum og fulltrúum ýmissa fyrirtækja og stofnana. Einnig sóttu ráðstefnuna hátt á annað hundrað sérfræðingar í jarðhita frá tugum þjóðlanda sem lokið hafa námi við Jarðhitaskóla Sameinuðu þjóðanna á Íslandi.
Íslenska djúpborunarverkefnið
Íslenska djúpborunarverkefnið er framsækið rannsókna- og þróunarverkefni og hefur undanfarin áratug vakið athygli um allan heim. Hugmyndin um að bora djúpt í rætur háhitakerfa á eldvirkum svæðum eftir vökva við yfirmarksástand (e. supercritical condition), þ.e. hita yfir 370°C og þrýstingi yfir 220 börum, var fyrst kynnt opinberlega á heimsþingi jarðhitasambandsins árið 2000. Þau jákvæðu viðbrögð sem hugmyndin hlaut þar sköpuðu grunninn að alþjóðlegri þátttöku í verkefninu. Á heimsþinginu 2005 var verkhönnun kynnt. Það þótti því við hæfi að gera borun fyrstu djúpborunarholunnar í Kröflu góð skil á heimþinginu á Bali. Tvær sérstakar málstofur voru tileinkaðar verkefninu, hvor með fimm kynningum og einu vara-erindi, en að auki voru þrjú erindi kynnt á málstofum um borun. Eftirfarandi erindi voru flutt um verkefnið á Bali
Norðausturlandsverkefnið
Frá árinu 2005 hafa Landsvirkjun og Þeistareykir ehf, sem Landsvirkjun á nú um 64% hlut í, staðið markvisst að rannsóknum og virkjanaundirbúningi á jarðhitasvæðum í Þingeyjarsýslu vegna mögulegrar orkuöflunar fyrir stóriðju á Norðausturlandi. Helst hefur verið horft til virkjunar jarðvarmans í Bjarnarflagi, Kröflu og á Þeistareykjum, allt að 430 MW rafafli, fyrir álver á Bakka við Húsavík. Ef af því verkefni verður yrði um að ræða eitt umfangsmesta jarðvarmaverkefni heims og því vekur verkefnið mikla athygli.
Að lokum má benda á áhugavert erindi eftir nefnd íslenskra sérfræðinga sem unnið hafa að skilgreiningu á sjálfbærni jarðvarmanýtingar með það að markmiði að aðstoða stjórnvöld við stýringu auðlindanýtingarinnar. Sérfræðingar Landsvirkjunar hafa m.a. komið að þeirri vinnu undanfarin tvö til þrjú ár.