Landsvirkjun kannar áhrif loftslagsbreytinga á raforkuframleiðslu
Allt frá árinu 2002 hefur Landsvirkjun tekið þátt í samnorrænum rannsóknarverkefnum á breytingum rennslis vegna loftlagsbreytinga.
Niðurstöður rannsóknanna gefa vísbendingu um að hærra hitastig auki rennsli mikið í jökulám. Vatnsforði Landsvirkjunar er að mestu leyti bundinn í jöklum og munu þeir bráðna hraðar en áður var gert ráð fyrir. Vitneskja um aukið rennsli er því mikilvæg vegna reksturs stöðva Landsvirkjunar.
Miðað við núverandi spár um hækkun hitastigs mun afrennsli frá jöklum aukast mikið í framtíðinni umfram þá aukningu sem þegar er komin fram. Vegna hlýnunar loftslags munu jöklar landsins hverfa á næstu 200 árum.
Unnið hefur verið að endurskoðun á rennslislíkönum og rennslisröðum sem Landsvirkjun notar við áætlanir fyrir núverandi raforkukerfi. Rennslisraðir sýna staðbundið rennsli frá árinu 1950. Þessar upplýsingar sem líkön og rennslisraðir veita eru notaðar við mat á orkugetu núverandi virkjunarkerfis Landsvirkjunar og við mat á orkugetu og afli í virkjunum sem eru í undirbúningi.
Í lok árs 2006 var tekin ákvörðun um að nota einungis síðustu 20 ár í rennslisröðum við ákvörðun á orkugetu raforkukerfis Landsvirkjunar. Við þá breytingu jókst orkugetan um 765 GWst á ári. Með þessu var tekið tillit til þess að loftslag væri að hlýna og litlar líkur væru á endurtekningu rennslisminnstu og köldustu ára í rennslisröðum Landsvirkjunar.
Í lok árs 2009 var skrefið stigið til fulls og tekin ákvörðun um að nota úrkomu- og hitastigsleiðréttar rennslisraðir sem taka mið af loftslagsbreytingum sem þegar hafa orðið og spám um framtíðarbreytingar. Við þetta jókst orkugetan fyrir árið 2010 um 285 GWst á ári. Samtals eykst orkugetan því um 1.050 GWst á ári sem fæst með betri nýtingu stöðva sem þegar eru fyrir í raforkukerfi Landsvirkjunar. Til samanburðar var heildarframleiðsla Landsvirkjunar 12.154 GWst árið 2009.
Hitastigsleiðréttingar sem eru notaðar eru metnar á varfærinn hátt og eru aðeins lægri en spár segja fyrir um. Leiðréttar rennslisraðir hafa verið búnar til fyrir árin 2010, 2015, 2025, 2035 og 2050.
Ef þessar rennslisspár rætast munu stöðvar Landsvirkjunar einungis geta nýtt hluta aukningar í rennslinu þar sem þær búa ekki yfir nægilegu afli. Landsvirkjun vinnur að því að kanna með hvaða móti unnt er að bregðast við þessum breytingum í framleiðslu sinni.