Þeistareykir ehf. leggja fram drög að tillögu að matsáætlun
Þeistareykir ehf., sem er sameignarfyrirtæki Orkuveitu Húsavíkur, Norðurorku, Landsvirkjunar, Aðaldælahrepps og Reykdælahrepps, hafa lagt fram drög að matsáætlun vegna fyrirhugaðrar Þeistareykjavirkjunar.
Jarðhitasvæðið á Þeistareykjum er talið vera eitt af þremur stærstu jarðhitasvæðum á Norðurlandi eystra. Þeistareykir ehf. var stofnað í apríl 1999. Stofnaðilar eru orkufyrirtækin Orkuveita Húsavíkur, Hita- og Vatnsveita Akureyrar (nú Norðurorka) ásamt Aðaldælahreppi og Reykdælahreppi. Haustið 2005 eignaðist Landsvirkjun um 32% í fyrirtækinu.
Þeistareykir ehf. fyrirhuga að reisa allt að 150 MWe jarðgufuvirkjun á Þeistareykjum í Aðaldælahreppi í Þingeyjarsýslu. Framkvæmdin er matsskyld skv. lögum um mat á umhverfisáhrifum nr. 106/2000.
Skýrslan með drögum að tillögu að matsáætlun er kynnt á vefnum www.theistareykir.is. Frestur til að skila athugasemdum er til 21.12. 2007.