Ærandi hávaði frá holu 36 í Kröflu
Haft var eftir Árna Gunnarssyni verkfræðingi á verkfræði- og framkvæmdasviði í Morgunblaðinu í morgun að hola 36 í Kröflu væri ærandi. Opnað var fyrir holuna í gær og hún látin blása.
Að sögn sérfræðinga hjá Íslenskum orkurannsóknum (ÍSOR) kom holan kröftuglega upp með tiltölulega hreinni gufu. Ekkert vatn fylgdi gufunni og hélst það þannig allan tímann. Eftir 5-10 mínútur fór gufan að dökkna og um tíma var mökkurinn nánast svartur eins og sjá má í eldgosum. Sunnan strekkingur var meðan á upphleypingu stóð og litaðist snjórinn svartur undir mekkinum sem teygðist einhverja hundruð metra. Áfallið var örþunnt en þétt, varla þykkara en 1-2 mm. Um klukkustund síðar var strókurinn upp úr hljóðdeyfinum orðinn nokkuð hreinn. Að öllum líkindum hefur brennisteinsvetni valdið þessum litabreytingum.
Ekki fengust öruggar afltölur þar sem mælitæki brotnaði í látunum, en samkvæmt sérfræðingum ÍSOR er líklegt að aflið hafi verið á bilinu 20-30 MW eftir upphleypingu.
Holan er á borplani KJ-34 og var stefnuboruð til norðvesturs. Botn holunnar er í um 1 km fjarlægð frá holutoppi í láréttri fjarlægð. Síðasti verkdagur borsins Jötuns á holunni var 19. nóvember en þá var henni lokað.
Á myndinni hér að neðan er Kristján Stefánsson, en þeir Karl Emil Sveinsson, starfsmenn í Kröflu, sáu um upphleypingu holunnar. Á neðri myndinni sést hve þéttur gufustrókurinn frá hljóðdeyfinum var.
