Rannsóknaboranir við Kröflu í Skútustaðahreppi
Landsvirkjun hefur lagt fram drög að tillögu að matsáætlun vegna rannsóknaborana í Kröflu.
Landsvirkjun áformar að bora allt að fjórar rannsóknaholur við Kröflu, í Skútustaðahreppi.
Í 6. gr. og 2. viðauka, tl. 2 c i, í lögum nr. 106/2000 m.s.b., um mat á umhverfisáhrifum, kemur fram að djúpborun og þar með talin borun rannsóknahola á háhitasvæðum, sé tilkynningarskyld framkvæmd. Í ljósi aðstæðna óskaði Landsvirkjun hins vegar eftir því að fara með fyrirhugaðar rannsóknaboranir beint í mat á umhverfisáhrifum skv. IV. kafla laganna og hefur Skipulagsstofnun fallist á þá málsmeðferð.
Landsvirkjun hefur dregið til baka tillögu að matsáætlun vegna Kröfluvirkjunar II, sem var til meðferðar hjá Skipulagsstofnun. Þessi drög að tillögu að matsáætlun sem hér eru auglýst koma í stað þeirrrar tillögu.
Matsvinnan vegna rannsóknaborananna er hafin og hér á síðunni má nálgast drög að tillögu að matsáætlun vegna borananna. Í tillögunni er fyrirhugaðri framkvæmd og framkvæmdasvæði lýst. Fjallað er um þá umhverfisþætti sem teknir verða fyrir í matinu. Einnig er tilgreint hvaða gögn eru fyrir hendi sem nýtt verða við matið og hvaða rannsóknir er fyrirhugað að ráðast í vegna mats á umhverfisáhrifum.
Allir hafa rétt til að kynna sér drög að tillögu að matsáætlun og leggja fram athugasemdir. Vinsamlegast beinið fyrirspurnum, athugasemdum og ábendingum til Alberts Guðmundssonar, á netfangið albert hjá lvp.is með afriti til Hauks Einarssonar, á netfangið haukur hjá mannvit.is. Frestur til að gera athugasemdir er til 26. nóvember 2008.
Drög að tillögu að matsáætlun vegna rannsóknaborana við Kröflu