Um arðsemi Landsvirkjunar
Fyrirtækið Sjónarrönd birti á dögunum áfangaskýrslu vegna verkefnis sem fyrirtækið vinnur nú fyrir fjármálaráðuneytið um mat á afrakstri orkusölu til erlendrar stóriðju. Í skýrslunni eru settar fram villandi fullyrðingar um arðsemi íslenskra orkufyrirtækja í samanburði við innlenda og erlenda aðila. Hér verður farið nokkrum orðum um arðsemi Landsvirkjunar á undanförnum árum.
Skýrsluhöfundar bera saman arðsemi innlendra og erlendra fyrirtækja og skoða mislöng tímabil allt frá 1988 til 2008. Þeir nefna ekki að verðbólgureikningsskil voru notuð hérlendis þar til í árslok 2002 á meðan kostnaðarverðsreikningsskil voru notuð í Evrópu og Bandaríkjunum. Þetta gerir samanburð á arðsemi eigin fjár á Íslandi og annars staðar fyrir 2002 villandi og hefur áhrif á allan samanburð síðar, sérstaklega þegar um er að ræða orkumannvirki og aðrar eignir með langan líftíma.
Skýrsluhöfundar fullyrða að í Evrópu og Bandaríkjunum standist orkufyrirtæki arðsemiskröfu betur en aðrar atvinnugreinar á meðan íslensk orkufyrirtæki standist hana þriðjungi verr en aðrar hérlendar atvinnugreinar. Þessi fullyrðing stenst ekki skoðun.
Össur hf. og Marel hf. eru á meðal best þekktu iðnfyrirtækja landsins og eru bæði á hlutabréfamarkaði. Þessi félög eru í rekstri sem talinn er áhættumeiri en rekstur Landsvirkjunar. Arðsemi eigin fjár í þessum félögum ætti því að vera umtalsvert hærri en hjá Landsvirkjun. Svo er þó ekki eins og sjá má í töflunni að neðan sem unnin er úr ársreikningum Landsvirkjunar og þessara félaga. Skýrsla Sjónarrandar sýnir arðsemi orkufyrirtækja í Evrópu aðeins til 2007 og því er látið staðar numið þar.
| 2003 | 2004 | 2005 | 2006 | 2007 | Meðaltal | |
| Landsvirkjun | 4% | 14% | 11% | 6% | 29% | 13% |
| Marel | 17% | 31% | 18% | 0% | 4% | 14% |
| Össur | 11% | 31% | 15% | 3% | 4% | 13% |
| Orkufyrirtæki í USA* | 11% | 10% | 9% | 10% | 11% | 10% |
| Orkufyrirtæki í Evrópu* | 11% | 12% | 12% | 15% | 15% | 13% |
* Upplýsingar úr skýrslu Sjónarrandar
Eins og sjá má er meðalarðsemi eigin fjár fyrirtækjanna svipuð á þessu tímabili og arðsemi Landsvirkjunar sambærileg við arðsemi orkufyrirtækja í Evrópu og Bandaríkjunum.
Þess ber að geta að ef bætt er við árinu 2008 lækkar meðalarðsemi Landsvirkjunar nokkuð en snörp lækkun álverðs kom illa við afkomu fyrirtækisins á liðnu ári. Álverð hefur nú hækkað verulega á nýjan leik sem eykur aftur arðsemi fyrirtækisins.