Landsvirkjun

Vísindavefurinn og Landsvirkjun vinna saman að miðlun vísinda til almennings

31. mars 2011

Samningurinn felur meðal annars í sér miðlun Landsvirkjunar á úrvali svara Vísindavefsins um orku og orkumál í fræðsluskyni. Báðir samningsaðilar hafa áhuga á að þróa samstarfið frekar á komandi misserum.

Á meðal spurninga sem almennir lesendur hafa sent Vísindavefnum um orkumál má til dæmis nefna: Hvernig varð rafmagn til? Hvernig framleiðir hrökkáll rafmagn? Er hægt að sjá eitt atóm eða eina rafeind? Hvernig er hægt að geyma og nýta orku frá vindrafstöðvum? og Er hægt að framleiða rafmagn með grænmeti eða ávöxtum?

Vísindavefur Háskóla Íslands hefur starfað frá árinu 2000 og notið mikilla vinsælda. Á vefnum er að finna þúsundir svara við spurningum almennings um allt milli himins og jarðar, allt frá stjörnufræði til handrita og frá sameindalíffræði til sálarfræði. Duglegustu spyrjendurnir eru yfirleitt á aldrinum 10-20 ára.

Vísindavefurinn hefur reynslu af fjölbreyttu starfi sem tengist vísindamiðlun, til dæmis námskeiðahaldi um vísindi fyrir fjölskyldur, bókaútgáfu um vísindi og gerð vísindadagatals, svo nokkur dæmi séu nefnd.

Landsvirkjun er orkufyrirtæki í eigu íslensku þjóðarinnar. Fyrirtækið vinnur rafmagn úr endurnýjanlegum orkugjöfum, vatnsafli og jarðvarma. Landsvirkjun vinnur 75% allrar raforku í landinu og er stærsti raforkuframleiðandi á Íslandi. Landsvirkjun er leiðandi í sjálfbærri nýtingu orkugjafa og leggur áherslu á að stuðla að aukinni þekkingu, nýsköpun og tækniþróun.

Jón Gunnar Þorsteinsson og Ragna Sara Jónsdóttir

Jón Gunnar Þorsteinsson, ritstjóri Vísindavefs Háskóla Íslands og
Ragna Sara Jónsdóttir, yfirmaður samskiptasviðs Landsvirkjunar
 

Fréttasafn Prenta