Landsvirkjun

TH!NK rafbíll vekur athygli á ferð um landið

11. júlí 2011

Það voru starfsmenn Landsvirkjunar á báðum stöðum sem kynntu bílinn fyrir almenningi, svöruðu tæknilegum spurningum og leyfðu fólki að prófa. Stöðugur straumur var að bílnum og margar spurningar sem brunnu á fólki, þá helst um verð rafbíla, áætlaðan orkukostnað og svo framvegis og ljóst að áhugi almennings á rafbílum er mikill.

Landsvirkjun hefur bílinn, sem er norskt hugvit, til leigu í samstarfi við Íslenska Nýorku og er tilgangurinn að safna gögnum um notkun rafbíla við íslenskar aðstæður. Verkefnið hófst formlega þann 30. maí síðastliðinn og hefur gengið mjög vel fram að þessu. Bifreiðin mun koma við á öllum aflstöðvum Landsvirkjunar og vera til prófunar á hverjum stað í um vikutíma. Nú þegar hefur bíllinn komið við á Þjórsár- og Sogssvæði, Blöndustöð og Akureyri og er nú staðsettur á Mývatnssvæðinu áður en hann heldur för sinni áfram á svæði Fljótsdalsstöðvar. Þegar bílinn fór frá Akureyri hafði hann verið keyrður um 2300 km og notað um 660 kWst. af raforku.

Markmið Landsvirkjunar með verkefninu og ferð bílsins er að safna upplýsingum um notkun rafbíla við ólíkar aðstæður og skoða hvort rafbílar séu raunhæfur kostur við vinnu á aflstöðvum Landsvirkjunar, auk þess að styðja við tilraunir og þróun í málaflokknum. Um er að ræða framhald á verkefni síðasta sumars en þá hafði Landsvirkjun til afnota og prófunar Mitshubishi i-MiEV rafbíl.

Vera TH!NK bílsins hér á landi í sumar er liður í samstarfsverkefni Íslands, Grænlands og Færeyja er nefnist El-Mobility og skoðar hvernig rafbílar reynast á norðlægum slóðum. Hluti verkefnisins sneri að því að gera almenningi kleift að prófa rafbíla og á liðnum vetri bauðst átta fjölskyldum á höfuðborgarsvæðinu að taka þátt í rannsókninni og leigja bæði raf- og vetnisrafbíla. Landsvirkjun styrkti það verkefni sem bar vinnuheitið Rafbílar til almennings.

rafbill

 Bíllinn til sýnis á Akureyri, Sigurður Óli starfsmaður Landsvirkjunar ræðir við áhugasama um bílinn

Fréttasafn Prenta