Landsvirkjun

Moody's staðfestir óbreytta lánshæfiseinkunn Landsvirkjunar, Baa3, en hækkar grunneinkunn upp um einn flokk eða úr B2 í B1

23. mars 2012

Matsfyrirtækið Moody's hefur staðfest lánshæfiseinkunn Landsvirkjunar, Baa3, með neikvæðum horfum.  Einkunnin endurspeglar samvarandi einkunn Ríkissjóðs Íslands.  Þá hefur Moody's hækkað grunneinkunn Landsvirkjunar úr B2 í B1 vegna bættrar fjárhagsstöðu Landsvirkjunar. 

Í tilkynningu frá Moody's segir meðal annars að samfara staðfestingu á óbreyttri lánshæfiseinkunn Landsvirkjunar (Baa3) hefur Moody's hækkað grunneinkunn Landsvirkjunar (Standalone einkunn eða Baseline Credit Assessment, BCA) úr B2 í B1.  Ástæðan er bætt fjárhagstaða Landsvirkjunar þar sem sjóðstreymi hafi styrkst og lausafjárstaða batnað.  Auk þess er tekið tillit til sterkrar fjárhagsstöðu og mikilvægi fyrirtækisins á íslenskum raforkumarkaði með stuðningi af sterku eignasafni til vinnslu á  endurnýjanlegri orku. 
    

Hörður Arnarsson, forstjóri Landsvirkjunar:

 

Það að hækka grunneinkunn Landsvirkjunar  eru mikilvæg skilaboð og sýna að fyrirtækið er á réttri leið. Landsvirkjun hefur unnið markvisst að því að draga úr skuldsetningu í kjölfar gangsetningar Kárahnjúkavirkjunar og bæta reksturinn.  Þó er enn mikið verk óunnið en þrátt fyrir hækkun grunneinkunnar í B1 er hún enn 4 flokkum fyrir neðan lánshæfiseinkunnina, Baa3.  Fyrirtækið er enn of skuldsett og verður áfram lögð áhersla á að lækka skuldir á næstu árum.     

 

Fréttasafn Prenta