Landsvirkjun

Hálslón komið á yfirfall

7. ágúst 2012

 

karahnjukarHálslón hefur náð yfirfallshæð sem er 625 metrar yfir sjávarmáli og vatn úr lóninu mun því renna á yfirfalli niður í farveg Jökulsár á Dal. Búast má við auknu rennsli í Jökulsá á Dal í kjölfarið. Í dag eru sex ár síðan Hálslón byrjaði að myndast en lónið hefur fyllst á hverju ári síðan árið 2007. Í ár hefur lónið fyllst rúmum fimm vikum fyrr en á árinu 2011.

Þegar vatn rennur á yfirfalli myndast fossinn Hverfandi við vestari enda Kárahnjúkastíflu niður að gljúfurbarminum og þaðan steypist vatnið 90-100 metra niður í Hafrahvammagljúfur. Fossinn er aflmikill og getur orðið vatnsmeiri en Dettifoss.

Staða miðlunarlóna um 9% hærri en í meðalári
Miðlunarlón Landsvirkjunar hafa nú náð 92% fyllingu, þrátt fyrir að vatn hafi runnið óhindrað í farvegi Jökulsár í Fljótsdal og efri hluta Þjórsár frá því í maí. Í lok júlí var kominn verulegur kraftur í jökulárnar og nokkuð víst að öll miðlunarlón muni fyllast í sumar.

Ástæður þessa eru nokkrar. Síðasta haust var mjög langt og rennsli jökuláa talsvert alveg fram í lok nóvember. Sem dæmi má nefna að þann

mánuð var fjórum sinnum meira innrennsli í Hálslón en búist var við. Milt haust skilaði síðan hárri stöðu miðlana í allan vetur. Á vormánuðum var leysing kröftug þar sem mikill snjór hafði safnast upp á hálendinu. Miðlanir náðu því strax hárri stöðu auk þess sem grunnvatnsstaða hækkaði. Há grunnvatnsstaða hefur svo viðhaldið rennsli lindáa fram eftir sumri.

Blöndulón stóð fyrir helgi í 477 m.y.s og vantar tæpa 80 cm á að það fyllist en gert er ráð fyrir að það fyllist um miðjan ágúst. Þórisvatn er nánast fullt og vegna framkvæmda við Búðarháls verður það ekki fyllt meira.

Hálslón á yfirfalli 2007-2012 
 Ár         Dagsetning
 2012      7. ágúst
 2011      13. september
 2010      28. júlí
 2009      9. september
 2008      16. ágúst
 2007      18. október

Fréttasafn Prenta