Landsvirkjun

Auglýst eftir umsóknum um styrki vegna meistara- eða doktorsverkefna

28. desember 2004

Ákveðið hefur verið að verja samtals 3 milljónum króna í námsstyrki á árinu 2005 og verður styrkjum úthlutað í apríl næstkomandi. Hver styrkur verður að lágmarki 400 þúsund krónur.

Markmið með námsstyrkjunum er að efla menntun og hvetja til rannsókna á hinum margvíslegu sviðum sem tengjast starfsemi Landsvirkjunar. Umsækjendur eru sérstaklega hvattir til að kynna sér hina fjölbreyttu starfsemi Landsvirkjunar á vefsíðu fyrirtækisins. Styrkjunum er ætlað  að standa undir hluta af kostnaði við lokaverkefni sem hafið er eða mun hefjast á árinu 2005.

Umsækjendur þurfa að leggja fram lýsingu á verkefninu og rökstuðning fyrir því að verkefnið tengist starfsemi Landsvirkjunar, ásamt meðmælum frá  leiðbeinanda.

Umsóknum ásamt fylgigögnum skal skila á skrifstofu Landsvirkjunar, Háaleitisbraut 68, 103 Reykjavík, merktum: „NÁMSSTYRKIR LANDSVIRKJUNAR 2005“. Umsækjendur skulu skila umsóknum á umsóknareyðublaði á þessari síðu.

Umsóknarfrestur er til 25. janúar 2005. Öllum umsóknum verður svarað og farið verður með þær sem trúnaðarmál.

Fimm manna úthlutunarnefnd mun meta styrkumsóknir og velja þau verkefni sem hljóta styrk. Í úthlutunarnefndinni sitja Stefanía Katrín Karlsdóttir (formaður), rektor Tækniháskóla Íslands, Gunnar Örn Gunnarsson, framkvæmdastjóri Nýsköpunarsjóðs atvinnulífsins, Hildur Hrólfsdóttir, verkfræðingur hjá Landsneti, Hulda Pjetursdóttir, viðskiptafræðingur á fjármálasviði Landsvirkjunar, og Bjarni Pálsson verkfræðingur á verkfræði- og framkvæmdasviði Landsvirkjunar.

 

Fréttasafn Prenta