Landsvirkjun

Hægt að sætta sjónarmið umhverfisverndar og virkjunar orku

23. janúar 2006

Einnig telur mikill meirihluti að ál- og raforkufyrirtæki á Íslandi standi vel að umhverfismálum.

Þátttakendur voru spurðir hvort þeir teldu hægt að sætta sjónarmið umhverfisverndar og virkjunar vatns- og gufuafls. 88% svarenda töldu hægt að sætta sjónarmið umhverfisverndar og virkjunar gufuafls og 70% töldu hægt að sætta sjónarmið umhverfisverndar og virkjunar vatnsafls.

Þá voru þátttakendur spurðir hvort þeir teldu ál- og raforkufyrirtæki á Íslandi standa sig vel eða illa í umhverfismálum. 77% töldu raforkufyrirtæki standa sig vel í umhverfismálum, 13% illa og 10% voru hlutlaus eða svöruðu hvorki né. 72% töldu álfyrirtæki standa sig vel í umhverfismálum, 16% illa og 13% voru hlutlaus eða svöruðu hvorki né.

Nánar um spurningar og svör

Telur þú að hægt sé að sætta sjónarmið umhverfisverndar og virkjunar gufuafls?
Já: 88,3%     Nei:   11,7%

Telur þú að hægt sé að sætta sjónarmið umhverfisverndar og virkunar vatnsafls?
Já: 69,7%    Nei:   30,3%

Telur þú að raforkufyrirtæki á Íslandi standi vel eða illa að umhverfismálum?
Mjög vel: 26,3%   Frekar vel: 51,1%   Hvorki né / hlutlaus: 9,6%   Frekar illa: 9,6%   Mjög illa: 3,5%

Frammistaða raforkufyrirtækja í umhverfismálum

Telur þú að álfyrirtæki á Íslandi standi vel eða illa að umhverfismálum?
Mjög vel: 18,0%   Frekar vel: 53,5%   Hvorki né / hlutlaus: 12,7%   Frekar illa: 11,2%   Mjög illa: 4,6%

Frammistaða álfyrirtækja í umhverfismálum

Í könnuninni var spurt tólf spurninga. Niðurstöður könnunarinnar verða kynntar í heild sinni á ráðstefnunni Orkulindin Ísland sem haldin verður á Hótel Nordica föstudaginn 27. janúar nk 27. janúar. Að ráðstefnunni standa Samorka, Samtök atvinnulífsins og Samtök iðnaðarins, og þar verður fjallað um gildi ál- og orkuframleiðslu á Íslandi. Dagskrá ráðstefnunnar má sjá á vef SA.

Í pallborðsumræðum þar sem rætt verður um stöðu og horfur taka þátt þau Björgólfur Thorsteinsson, formaður Landverndar, Friðrik Sophusson, forstjóri Landsvirkjunar, Guðmundur Þóroddsson, forstjóri Orkuveitu Reykjavíkur, Júlíus Jónsson, forstjóri Hitaveitu Suðurnesja, Rannveig Rist, forstjóri Alcan á Íslandi, Ragnar Guðmundsson, framkvæmdastjóri hjá Norðuráli og Tómas Már Sigurðsson, forstjóri Alcoa Fjarðaáls.

Könnunin var símakönnun IMG Gallup, framkvæmd á tímabilinu 16.-29. nóvember 2005. Endanlegt úrtak voru 1.303, handahófsvalið af öllu landinu úr þjóðskrá. Fjöldi svarenda var 801, eða 61,5%.

 

Fréttasafn Prenta