Landsvirkjun

Ráðstefna um áhrif loftslagsbreytinga á endurnýjanlega orkugjafa

11. maí 2006

Á undanförnum árum hefur verið unnið að norrænu samstarfsverkefni um áhrif loftslagsbreytinga á endurnýjanlega orkugjafa. Verkefnið er kallað Climate and Energy og er fjármagnað af Norrænum orkurannsóknum, Nordic Energy Research og fyrirtækjum innan norræna orkugeirans.

Í þessu verkefni er meðal annars metið hvernig orkuframleiðsla getur verið háð loftslagsbreytingum, bæði í tíma og rúmi. Í verkefninu er fjallað um náttúruhamfarir á við flóð, þurrka, fárviðri og árstíðabundin frávik í veðurfari. Með hliðsjón af þessum rannsóknum verður búinn til grunnur sem nota má við ákvarðanatöku varðandi loftslagsbreytingar og orkumál á Norðurlöndum.

Samhliða þessu verkefni er unnið að sambærilegu verkefni hér innanlands sem kallað er Veður og orka og er samstarfsverkefni Landsvirkjunar og Vatnamælinga Orkustofnunar. Orkusjóður og iðnaðarráðuneyti styrkja verkefnið með fjárframlögum. Bæði verkefnin eru undir stjórn Vatnamælinga Orkustofnunar. Alþjóðlega verkefninu Climate and Energy lýkur á þessu ári og hefur verið ákveðið að kalla til evrópskrar ráðstefnu undir heitinu:

European Conference on Impacts of Climate Change on Renewable Energy Sources 

Ráðstefnan verður haldin dagana 5. - 9. júní 2006 á Nordica hótel í Reykjavík. Megintilgangur ráðstefnunar er að kynna niðurstöður Climate and Energy verkefnisins fyrir þeim sem vinna að þessum málum innan orkugeirans og þá bæði þeirra sem vinna innan fyrirtækja jafnt sem stjórnsýslu. Jafnframt að kynna niðurstöðurnar fyrir stærri hópi innan Evrópu og leggja þar grunninn að frekara samstarfi á Evrópuvísu. Falast verður eftir fyrirlesurum frá orkugeiranum til þess að draga sem skýrast fram þarfir hans í nútíð og framtíð.

Fréttasafn Prenta