Landsvirkjun

Árni Benediktsson, rafmagnsverkfræðingur ársins

13. maí 2008
Titillinn "rafmagnsverkfræðingur ársins" er sameiginleg viðurkenning Verkfræðingafélags Íslands og IEEE, alþjóðlegs félags rafmagnsverkfræðinga sem hefur á að skipa um 375 þúsund félagsmönnum í yfir 160 löndum.
 
Þetta er í annað sinn sem viðurkenningin „rafmagnsverkfræðingur ársins”er veitt hér á landi. Markmiðið er m.a. að vekja athygli á árangri verkfræðinga í starfi og afrekum þeirra sem vert er að halda á lofti. Verðlaunin eru veitt þeim rafmagnsverkfræðingum sem hverju sinni þykja skara fram úr í störfum sínum á sviði rafmagnsverkfræði eða fyrir íslenskt samfélag.
 
Verðlaunin eru veitt annað hvert ár. Auglýst var eftir tilnefningum og voru skilyrði þau að viðkomandi væri Íslendingur eða starfandi á Íslandi. Sameiginleg dómnefnd VFÍ og IEEE á Íslandi valdi verðlaunahafana.

Í tilefni af verðlaunaafhendingunni komu hingað til lands tveir fulltrúar IEEE, þeir Anthony C. Davies, fyrrum formaður IEEE fyrir Evrópu, Afríku og Mið-Austurlönd og Lewis Terman, sem starfað hefur að rannsóknum hjá IBM og er í framboði til forseta IEEE.
 
Árni Benediktsson lauk prófi í rafmagnsverkfræði frá Háskóla Íslands 1976. Árni starfar í dag sem þróunarstjóri orkusviðs Landsvirkjunar.
 
Sem deildarstjóri vél- og rafbúnaðardeildar hjá Landsvirkjun bar Árni faglega ábyrgð á hönnun, vali, kaupum og uppsetningu á vél- og rafbúnaði Kárahnjúkavirkjunar. Þegar fyrir lá að dráttur yrði á verklokum við aðrennslisgöng virkjunarinnar, stóð Árni fyrir aðgerðum sem leiddu til þess að það tókst að gangsetja álverið á Reyðarfirði á réttum tíma. Hugmyndin að baki þeim aðgerðum fólst í því að keyra eina vél án vatns sem samfasavél með ákveðnum breytingum. Með þessum aðgerðum var hægt að ná upp nægu skammhlaupsafli í annars veiku raforkukerfi Austurlands til þess að hægt væri að gangsetja álverið. Ávinningurinn af þessu var gífurlegur jafnt fyrir samfélagið á Austurlandi sem og kaupanda og seljanda raforkunnar.
 
Í umsögn dómnefndar segir að Árni Benediktsson eigi að baki glæsilegan feril sem rafmagnsverkfræðingur og njóti mikillar virðingar fyrir störf sín jafnt innanlands sem utan.
 
Þór Jes Þórisson lauk verkfræðiprófi frá Háskóla Íslands árið 1986.  Hann gegnir stöðu framkvæmdastjóra tæknisviðs Símans hf.
 
Að tilstuðlan Þórs hefur Síminn skipað sér í flokk framsæknustu símafélaga tæknilega. Hann var drifkraftur við uppbyggingu gagnaneta Símans, bæði með ATM og IP tækni og hefur alla tíð verið ötull stuðningsmaður þekkingarleitar og rannsókna þar sem lagður er þekkingargrunnur að tækniuppbyggingu seinni tíma. Undir forystu Þórs hefur Síminn m.a. byggt upp ADSL2+ kerfi sem nær til tæplega 90% landsmanna, sjónvarpsdreifingu með IP tækni (IPTV) sem um 35% heimila nýta sér og byggt upp 3. kynslóðar farsímakerfi á höfuðborgarsvæðinu, sem verður útvíkkað til að ná til þorra landsmanna á næstu árum. Auk þessa hefur Þór verið baráttumaður um innleiðingu ljósleiðara í aðgangsnetinu en á þessu ári verða aðgangsnet í nýjum hverfum einungis byggð á ljósleiðurum.
 
Þór hefur einnig beitt sér á sviði félagsmála verkfræðinga og var m.a. formaður Stéttarfélags verkfræðinga. Hann hefur sýnt að rafmagnsverkfræðingar geta skarað fram úr, ekki aðeins sem tæknimenn heldur einnig sem markaðsmenn og stjórnendur.

 Rafmagnsverkfræðingar ársins 2008 

Á myndinni eru frá vinstri: James T. Cain, fyrrum formaður IEEE, Karl Sölvi Guðmundsson, formaður Íslandsdeildar IEEE, Árni Benediktsson, Þór Jes Þórisson, Victor F. Hanna formaður viðurkenningarnefndar IEEE í Evrópu, Afríku og Mið-austurlöndum og Kolbrún Reinholdsdóttir, formaður Rafmagnsverkfræðingadeildar VFÍ.

Fréttasafn Prenta