Landsvirkjun

Styttist í að vatn renni á yfirfalli Hálslóns við Kárahnjúka

8. ágúst 2008

Miðað við innrennslið undanfarna daga og veðurútlitið á næstunni má gera ráð fyrir að Hálslón nái yfirfallshæð sem er í 625 m yfir sjávarmáli á tímabilinu 12.-14. ágúst nk. Þá mun vatn byrja að renna um þar til gerða yfirfallsrennu við stífluna á vesturbakkanum og niður í gljúfrið neðan hennar og niður Jökuldal.

Vatnsrennsli í farvegi Jöklu neðan stíflunnar mun síðan aukast nokkuð hratt og gæti miðað við núgildandi veðurútlit orðið á bilinu 200 til 300 rúmmetra á sekúndu.  Í miklum hlýindum gæti rennslið orðið miklu meira.  Samkvæmt núgildandi spá mun vatn renna á yfirfalli fram í fyrstu viku október.

Ferðamenn sem leið eiga um svæðið eru sem fyrr beðnir um að gæta varúðar á vinnusvæðinu í grennd við stífluna sem og neðan hennar.

Þessi spá um vatnsrennsli á yfirfalli Hálslóns verður skoðuð nánar þegar nær dregur og íbúar við Jöklu verða þá látnir vita sérstaklega um væntanlegt aukið rennsli í ánni með um sólarhrings fyrirvara með símaskilaboðum frá 112.

 

 

Fréttasafn Prenta