Landsvirkjun

Endurnýjun vélbúnaðar gufustöðvarinnar í Bjarnarflagi

1. júlí 2016
Bjarnarflag

Landsvirkjun hefur ákveðið að endurnýja vélbúnað gömlu gufustöðvarinnar til að tryggja  áframhaldandi rekstur hennar. Útboðið verður auglýst á morgun en framkvæmdir munu fara fram sumarið 2017.

Jarðhitavinnsla í Bjarnarflagi á sér langa sögu. Upphaf núverandi virkjunar má rekja til ársins 1963, þegar fyrsta holan var boruð og fyrirtækið Léttsteypan hóf að nýta jarðhita frá Bjarnarflagi til þurrkunar á steypu og steypueiningum. Næstu árin voru boraðar fleiri holur samhliða uppbyggingu Kísiliðjunnar sem tók til starfa árið 1967.

Gamla gufustöðin í Bjarnarflagi hóf vinnslu rafmagns árið 1969 og er því elsta jarðhitastöð Íslands. Vélasamstæða stöðvarinnar er af gerðinni British-Thomson Houston (BTH), en hún hafði áður verið rekin í sykurverksmiðju í Bretlandi frá árinu 1934. Gamla vélasamstæðan hefur gefið verulega eftir undanfarin ár og er svo komið að hún framleiðir lítið rafmagn og er orðin varasöm að vinna við. Stöðin þjónar ekki lengur stóru hlutverki í orkuframleiðslu Íslands en er engu að síður mikilvæg fyrir Mývatnssveit. Hún vinnur allt það rafmagn sem sveitin þarf auk þess sem Hitaveita Skútustaðahrepps þiggur varma frá stöðinni og jarðböðin í Mývatnssveit byggja á skiljuvatni frá stöðinni.

Ekki verða truflanir á afhendingu rafmagns vegna þessa.

Fréttasafn Prenta