Landsvirkjun

Hverfill og rafall komnir á Þeistareyki

16. desember 2016
Hverfillinn vegur um 134 tonn.
Ekið með hverfilinn um götur Húsavíkur.
Hverflinum var bakkað inn í vélasal Þeistareykjavirkjunar.

Ein þyngsta vagnlest sem farið hefur um þjóðvegi landsins fór frá Húsavík að Þeistareykjum í vikunni, með hverfil og rafal fyrir fyrstu vélasamstæðu Þeistareykjavirkjunar. Heildarþyngd vagnlestarinnar með aðstoðardráttarbílum var um 220 tonn, en fyrra met, 196 tonn, var sett í flutningum aflspenna í Fljótsdalsstöð á sínum tíma.

Hverflinum og rafalnum var skipað upp á Húsavík, eftir að hafa komið til Íslands frá Japan með flutningsskipinu BBC Polonia, en skipið var rúmar tíu vikur á leiðinni. Því næst var hverfill fluttur frá Húsavíkurhöfn til Þeistareykja og degi síðar var rafall  fluttur sömu leið.

Hverfillinn vegur um 134 tonn og rafallinn 100 tonn, en annar búnaður sem kom með skipinu, meðal annars varahlutir, vega um 80 tonn. Þrír dráttarbílar voru nýttir við flutninginn, tveir toguðu í flutningsvagninn og einn ýtti á eftir. Flutningsvagninn er tólf hásinga með alls 96 dekk. Heildarþyngd vagnlestar með aðstoðardráttarbílum var sem fyrr segir um 220 tonn en farmurinn sjálfur 197 tonn. 

Í nóvember var eimsvali fluttur til Þeistareykja og er því allur þyngri búnaður fyrir vélasamstæðu 1 kominn á svæðið. Vinna við uppsetningu vélbúnaðar hefst á nýju ári. Fyrirtækið Fuji Electric frá Japan smíðar hverfilinn og rafalinn en þýska fyrirtækið Balcke-Dürr kalda enda, þar með talinn eimsvalann.

Frekari þungaflutningar eru fyrirhugaðir á næstu mánuðum, meðal annars á vélbúnaði fyrir vélasamstæðu 2, auk spenna og búnaðar fyrir kæliturn 2. Ráðgert er að þessir flutningar verði á fyrsta og öðrum ársfjórðungi 2017.

Fréttasafn Prenta