Landsvirkjun

Ísland 100. landið sem virkjar vindorku

23. maí 2013
Landsvirkjun reisti tvær vindmyllur ofan við Búrfell í lok árs 2012 sem vinna nú raforku inn á kerfi Landsnets

Alþjóðlegu vindorkusamtökin (World Wind Energy Association) hafa tilkynnt, að Ísland sé hundraðasta landið í heiminum til að virkja vind til almennrar raforkuvinnslu.  Í nýrri ársskýrslu samtakanna vegna ársins 2012 kemur fram, að uppsett vindafl hafi aukist um 19% milli ára og hafi í árslok verið 282 þúsund MW.

Í skýrslunni er vakin athygli á sérstöðu Íslands, þar sem öll innlend raforkuvinnsla byggir á nýtingu endurnýjanlegra orkugjafa. Landsvirkjun vinnur 73% allrar raforku í landinu og er eitt af tíu stærstu orkufyrirtækjum Evrópu á sviði endurnýjanlegra orkugjafa.

Haft er eftir Herði Arnarsyni, forstjóra Landsvirkjunar, að vindorka geti mögulega orðið þriðja stoðin í orkukerfi Landsvirkjunar til framtíðar og áhugavert verði að sjá hvernig hún muni nýtast með öðrum orkugjöfum fyrirtækisins.

Virkjun vindorku á heimsvísu hefur aukist mikið á undanförnum árum.  Í árslok 2012 komu 3% af allri raforku heimsins frá vindmyllum og Alþjóðlegu vindorkusamtökin spá mikilli aukningu á næstu misserum.  Þannig búast samtökin við því að uppsett afl frá vindmyllum muni tvöfaldast fyrir lok árs 2016 og innan átta ára gæti uppsett vindafl verið um ein milljón MW.

Ítarlegri upplýsingar og ársskýrslu Alþjóðlegu vindorkusamtakanna í heild má nálgast á http://www.wwindea.org/home/index.php?option=com_content&task=blogcategory&id=21&Itemid=43

Fréttasafn Prenta