Landsvirkjun

Landsvirkjun undirritar UN Global Compact

12. desember 2013

Bætist í hóp yfir 8.000 fyrirtækja og stofnana sem eru aðilar á alþjóðavísu

Landsvirkjun hefur undirritað viðmið Sameinuðu þjóðanna  um samfélagsábyrgð – UN Global Compact. Með því skuldbindur Landsvirkjun sig til að virða og innleiða tíu reglur um mannréttindi, vinnurétt, umhverfismál og varnir gegn spillingu.

Global Compact eru útbreiddustu viðmið um samfélagsábyrgð í heiminum, en rúmlega 8.000 fyrirtæki og stofnanir um allan heim hafa undirritað  Global Compact. Aðild Landsvirkjunar að Global Compact er eðlilegt framhald af innleiðingu á stefnu um samfélagsábyrgð sem fyrirtækið hefur unnið að undanfarin ár.

„Landsvirkjun hefur frá stofnun lagt mikla áherslu á samfélagslega ábyrgð fyrirtækisins. Með undirritun Global Compact tökum við enn eitt skrefið og vonumst til þess að aðildin styðji okkur í því að gera áherslur og aðgerðir okkar enn sýnilegri og markvissari,“ segir Hörður Arnarson forstjóri Landsvirkjunar.

Með undirritun Global Compact skuldbindur Landsvirkjun sig til að skila árlegri samantekt um framvindu og árangur á sviði samfélagsábyrgðar. „Slíkt yfirlit auðveldar hagsmunaaðilum Landsvirkjunar að fylgjast með og hafa áhrif á þær áherslur sem fyrirækið setur sér og þann árangur sem það nær á sviði samfélagsábyrgðar,“ segir Ragna Sara Jónsdóttir forstöðumaður samfélagsábyrgðar hjá Landsvirkjun.

Landsvirkjun setti sér stefnu um samfélagsábyrgð á haustdögum 2011 og hefur síðan unnið að innleiðingu og framkvæmd stefnunnar í fyrirtækinu. Með stefnunni hefur Landsvirkjun einsett sér að starfa eftir ábyrgum stjórnarháttum, vinna með ábyrgum viðskiptavinum og birgjum, leggja áherslu á sjálfbæra nýtingu náttúruauðlinda, eiga gott samstarf við samfélagið, stuðla að heilbrigði og öryggi starfsfólks og vinna markvisst að miðlun þekkingar og nýsköpun.

Fréttasafn Prenta