Landsvirkjun

Ört batnandi vatnsstaða í miðlunarlónum

8. maí 2014

Staðan í vatnsbúskapnum hefur nú vænkast það mikið að Landsvirkjun telur óhætt að hefja á ný fulla afhendingu rafmagns til þeirra viðskiptavina sem hafa þurft að sæta skertri afhendingu. Eins og kunnugt er hóf Landsvirkjun skerðingar á afgangsorku til stórnotenda og jafnorku til húshitunar undir lok febrúar. Á tímabilinu hefur verið dregið úr afhendingu rafmagns sem nemur um 2% af raforkuafhendingu síðasta árs.

Innrennsli til miðlunarlóna Landsvirkjunar hefur aukist umtalsvert og gera spár ráð fyrir áframhaldandi auknu innrennsli. Rennsli í Tungnaá, Þjórsá og Blöndu hefur aukist verulega.

Vatnshæð Þórisvatns hefur farið hækkandi og stendur nú í 561,1 m y.s. Þann 3. apríl fór vatnshæð Þórisvatns í lægstu stöðu sem mælst hefur frá upphafi 560,31 m y.s. og var það um 11 metrum undir meðaltali vatnshæðar Þórisvatns á þeim tíma árs. Vatnshæð Blöndulóns stendur nú í 469,5 m y.s. Lægst fór staðan í 466,9 m y.s. þann 5. apríl, sem var um 5 metrum undir meðalhæð á þeim árstíma. Innrennsli í Hálslón hefur einnig aukist og hægt á niðurdrætti í lóninu.

Samkvæmt samningum sem viðskiptavinir hafa gert við Landsvirkjun er heimilt að skerða afhendingu á rafmagni þegar vatnsbúskapur er slakur og er magn þess umsamið við hvern viðskiptavin eins og honum þykir henta sínum rekstri. Með því að hafa aðgang að slíkum skilmálum á afhendingu rafmagns, gefst Landsvirkjun í samstarfi við viðskiptavini sína kostur á að stunda hagkvæma raforkuöflun til hagsbóta fyrir viðskiptavinina til langs tíma.

Fréttasafn Prenta