Landsvirkjun

Samið um rannsóknir á sviði sjálfbærrar orku á norðurslóðum

10. október 2016
Frá undirritun samstarfssamningsins. Frá vinstri: Hörður Arnarson, forstjóri Landsvirkjunar, René Roy, verkefnastjóri loftslagsbreytinga, Hydro-Québec, Árni Snorrason, forstjóri Veðurstofu Íslands, Alain Bourque, Director General Quranos, Philippe Couillard, forsætisráðherra Québec (standandi), Cloude Arbour, rektor vísindarannsóknarháskólans í Québec, Ari Kristinn Jónsson, rektor Háskóla Reykjavíkur, Atli Benediktsson, rektor Háskóla Íslands, René Therrien, Laval háskólinn

Landsvirkjun, Veðurstofa Íslands, Háskóli Íslands og Háskólinn í Reykjavík hafa gert samning við fyrirtæki, háskóla og stofnanir í Québec-fylki í Kanada, um samstarf á sviði rannsókna og þjálfunar á sviði sjálfbærrar orku á norðurslóðum. Philippe Couillard, forsætisráðherra Québec, var viðstaddur þegar fulltrúar samningsaðila frá Québec og Íslandi skrifuðu undir samninginn á Arctic Circle ráðstefnunni í Hörpu.

Um er að ræða eftirtaldar stofnanir og fyrirtæki:

Frá Québec:

  • INRS – Institut national de la recherche scientifique – vísindarannsóknaháskólann í Québec
  • Laval háskólann í Québec
  • Hydro-Québec – orkufyrirtæki Québec-fylkis
  • Ouranos – samsteypu háskóla, orkufyrirtækja og ríkisstofnana í Kanada sem hefur með höndum rannsóknir á loftslagsbreytingum og sjálfbærri orkunýtingu

Frá Íslandi:

  • Landsvirkjun
  • Veðurstofa Íslands
  • Háskólinn í Reykjavík
  • Háskóli Íslands

Samkvæmt samningnum munu aðilar stofna til sameiginlegra rannsókna á sviði loftslagsmála og sjálfbærrar nýtingar. Þá munu aðilar einnig hafa samstarf um umsjón háskólastúdenta og starf fræðimanna og sérfræðinga og skipuleggja sameiginleg námskeið fyrir fræðimenn og nemendur, svo eitthvað sé nefnt. Auk þess munu þeir skiptast á kennslugögnum, fræðigreinum, líkönum og hugbúnaði og hafa samstarf um að leita fjármögnunar á rannsóknastarfi, heima fyrir og á alþjóðlegum vettvangi.

Hörður Arnarson, forstjóri Landsvirkjunar:

„Það er okkur hjá Landsvirkjun mikil ánægja að fá að taka þátt í þessu samstarfi með virtum stofnunum og fyrirtækjum í Québec og hér heima. Viðfangsefnin hér og þar eru um margt hin sömu – nýting endurnýjanlegra og sjálfbærra orkugjafa og baráttan við loftslagsbreytingar, sem Québec-búar gera sér grein fyrir, eins og við, að er eitt af stærstu málum samtímans og getur skipt sköpum fyrir framtíð okkar allra.“

Fréttasafn Prenta