Landsvirkjun

Samningur við Vísindavef Háskóla Íslands endurnýjaður

12. júní 2013
Magnús Þór Gylfason, yfirmaður samskiptasviðs Landsvirkjunar, og Jón Gunnar Þorsteinsson, ritstjóri Vísindavefsins, endurnýja samstarfið

Landsvirkjun hefur verið einn aðalstyrkaraðili Vísindavefsins frá árinu 2011 en samningurinn kveður á um samstarf um vandaða og nútímalega vísindamiðlun til almennings. Sameiginlegt markmið Landsvirkjunar og Vísindavefsins er að fræða ungt fólk og almenning um vísindi.

Á meðal spurninga sem almennir lesendur hafa sent Vísindavefnum um orkumál má til dæmis nefna: Hvað notar meðalheimili á Íslandi mörg vött af rafmagni? Hvað er mikill straumur í einni eldingu? Er mögulegt að láta hluti fljúga og ferðast með því einu að nota segul og rafmagn? Hversu nálægt háspennulínum er talið óhætt að búa?

Vísindavefur Háskóla Íslands hefur starfað frá árinu 2000 og notið mikilla vinsælda. Á vefnum er að finna þúsundir svara við spurningum almennings um allt milli himins og jarðar, allt frá stjörnufræði til handrita og frá sameindalíffræði til sálarfræði. Duglegustu spyrjendurnir eru yfirleitt á aldrinum 10-20 ára.

Vísindavefurinn hefur reynslu af fjölbreyttu starfi sem tengist vísindamiðlun, til dæmis námskeiðahaldi um vísindi fyrir fjölskyldur, bókaútgáfu um vísindi og gerð vísindadagatals, svo nokkur dæmi séu nefnd. Hægt er að kynna sér þessar spurningar hér að ofan og fleiri á vef vísindavefsins.

Landsvirkjun er orkufyrirtæki í eigu íslensku þjóðarinnar og vinnur rafmagn úr endurnýjanlegum orkugjöfum, vatnsafli og jarðvarma. Fyrirtækið vinnur 73% allrar raforku í landinu, er langstærsti vinnsluaðili raforku á Íslandi og eitt af tíu stærstu orkufyrirtækjum í Evrópu á sviði endurnýjanlegra orkugjafa.

Um leið er fyrirtækið leiðandi í sjálfbærri nýtingu orkugjafa og stuðlar að aukinni þekkingu, nýsköpun og tækniþróun

Fréttasafn Prenta