Landsvirkjun

Skref í átt að vistvænna Íslandi

8. ágúst 2013
i-MiEV rafbílar Landsvirkjunar munu bráðlega sjást á götum úti

Stærsta rafbílaafhending sem farið hefur fram á Íslandi, verður í dag klukkan 16.00 í Húsnæði HEKLU hf við Laugaveg. Tólf Mitsubishi i-MiEV rafbílar verða afhentir kaupendum sem flestir eiga það sameiginlegt að vera íslensk fyrirtæki á sviði orkumála. Friðbert Friðbertsson forstjóri HEKLU hf mun afhenda bílana að viðstöddum Iðnaðarráðherra Ragnheiði Elínu Árnadóttur.

Kaupendur bílanna eru Orkuveita Reykjavíkur, Landsvirkjun, Eignasjóður Reykjavíkur,  Landsnet, Skeljungur, HS orka, Norðurorka og Bílastæðasjóður. Með kaupunum eru fyrirtækin að stíga skref í átt að umhverfisvænni bílaflota og vilja um leið vekja athygli á því að rafbílar eru raunhæfur valkostur fyrir önnur fyrirtæki sem og almenning.
Rafbílar raunverulegur kostur en bílarnir fást tímabundið á kynningarkjörum

Til þess að gera áhugasömum kleift að vera með í þessari þróun hefur verið gert  samkomulag við Mitsubishi um að bjóða íslenskum almenningi rafbíla á  sömu kynningarkjörum og bílarnir í dag. Það tilboð er tímabundið og gildir á meðan birgðir endast. Góð reynsla er komin á notkun þessara  bíla á Íslandi enda komu þeir fyrstu til landsins fyrir meira en þremur árum. Bílarnir hafa reynst vel  og viðskiptavinir hafa verið  ánægðir með þá.

Friðbert Friðbertsson, forstjóri HEKLU hf;

„Þetta er merkilegur dagur. Aldrei fyrr hafa svo margir rafbílar verið afhentir á einu bretti á Íslandi. Þetta kann að vera eitt af stóru skrefunum í átt að umhverfisvænna samfélagi á Íslandi. Við ásamt Íslenskri NýOrku náðum virkilega hagstæðum samningum við Mitsubishi um verð á i-MiEV rafbílum og það verð endurspeglar þær væntingar sem HEKLA og Mitsubishi hafa til Íslands sem markaðar fyrir rafbíla.“

Vistvænir bílar hluti af framtíðarsýn

Upphaf kaupanna í dag má rekja til samkomulags sem gert var milli Mitsubishi, HEKLU, Orkustofnunar og Iðnaðarráðuneytisins árið 2008 í tengslum við kaup á hverflum fyrir jarðhitavirkjanir og hefur Íslensk NýOrka leitt það verkefni. Ljóst er að verulega er hægt að draga úr umhverfisáhrifum frá samgöngum með fjölgun bíla sem nota vistvænt eldsneyti. Nú þegar hafa á annað þúsund metan bíla verið skráðir en mikið átak þarf til að ná markmiðum opinberra aðila sem er að 10% alls eldsneytis á bíla á Íslandi verði vistvænt árið 2020.

Jón Björn Skúlason, framkvæmdastjóri Íslenskrar NýOrku:

„Þetta er stórt skref í rétta átt. En við getum gert betur og vonandi munu fleiri fyrirtæki og einstaklingar nýta sér þetta tilboð,“

 

Fréttasafn Prenta