Landsvirkjun

Stærstu hlutar vélarsamstæðu eitt komnir upp á Þeistareykjum

2. mars 2017
Fyrst var tveimur krönum stillt upp sem færðu rafalann nær undirstöðu, en var svo minni kraninn nýttur til að hífa rafalann sem er um 95 tonn upp á vélarundirstöðuna og á sinn stað.
Tveimur krönum var stillt upp og báðir voru nýttir til að hífa hverfilinn, sem vegur 112 tonn, á undirstöðu.
Mánudaginn 27. febrúar var eimsvali hífður á undirstöðu.

Rafal, hverfli og eimsvala var endanlega komið fyrir á vélarundirstöðum Þeistareykjavirkjunar á dögunum. Um var að ræða umfangsmiklar hífingar til að koma vélhlutunum fyrir, en til þess voru notaðir tveir kranar, 250 tonna og 300 tonna og sami flutningsvagn og flutti búnaðinn til Þeistareykja í desember.

Í desember kom rafall og hverfill fyrir fyrstu vélasamstæðuna Þeistareykjavirkjunar á verkstað. Nokkru fyrr hafði eimsvali komið á svæðið. Rafal og hverfli var komið fyrir í geymslu í vélarsal Þeistareykjavirkjunar og eimsvala fyrir utan til bráðabirgða. Frá því hefur verið unnið að undirbúningi á undirstöðum og uppsetningar á vélahlutum og rafal, hverfli og eimsvala komið fyrir á undirstöðunum um síðustu helgi.

Föstudagskvöldið 24. febrúar var rafallinn færður á sinn stað. Fyrst var tveimur krönum stillt upp sem færðu rafalann nær undirstöðu, en var svo minni kraninn nýttur til að hífa rafalann sem er um 95 tonn upp á vélarundirstöðuna og á sinn stað. Laugardaginn 25. febrúar var svo komið af hverflinum sjálfum en hann eru um 112 tonn. Tveimur krönum var stillt upp og báðir voru nýttir til að hífa hverfilinn á undirstöðu. Sunnudaginn 26. febrúar var eimsvali færður inn í stöðvarhús þar var hann geymdur í einn dag til að aðlagast hita í stöðvarhúsi. Mánudaginn 27. febrúar var eimsvali loks hífður á undirstöðu. Meðfylgjandi myndir eru frá hífingum á rafala, hverfli og eimsvala.

Er því búið að koma fyrir þessum stærstu vélarhlutum fyrir vélarsamstæðu eitt.

Stór áfangi í verkinu

Um er að ræða stóran áfanga í verkinu, en í framhaldinu verður unnið að uppsetningu minni búnaðar og tengingum. Stefnt er því að prófanir á vélasamstæðu eitt hefjist upp úr miðjum ágúst og að formlegur rekstur hefjist í byrjun desember.

Hverfill og rafall fyrir vélasamstæðu tvö lögðu af stað til Íslands frá Japan föstudaginn 24. febrúar og búist er við að þeir komi til landsins í maí. Eimsvali fyrir vélasamstæðu tvö kemur í seinnihluta mars.

Fréttasafn Prenta