Landsvirkjun

Stofnað til EIMS - samstarfsverkefnis á sviði orku-, umhverfis- og ferðamála á Norðausturlandi

13. júní 2016

EIMUR, samstarfsverkefni á sviði orku-, umhverfis- og ferðamála á Norðausturlandi, var stofnað með undirritun samstarfsyfirlýsingar bakhjarla verkefnisins á stofnfundi í Hofi á Akureyri, fimmtudaginn 9. júní. Landsvirkjun er einn af bakhjörlum verkefnisins og ritaði Hörður Arnarson forstjóri undir samstarfsyfirlýsinguna ásamt Arnóri Benónýssyni, varaformanni Eyþings, Ernu Björnsdóttur, stjórnarformanni Orkuveitu Húsavíkur og Helga Jóhannessyni forstjóra Norðurorku.

Fjölbreytt dagskrá var á stofnfundinum en samtals voru flutt níu erindi. Ragnheiður Elín Árnadóttir iðnaðar- og viðskiptaráðherra setti fundinn með stuttu ávarpi. Í máli ráðherra kom m.a. fram að ekki þyrfti að stilla ferðaþjónustu og orkuiðnaði á móti hvort öðru. Þessar atvinnugreinar gætu vel unnið saman eins og árangursrík dæmi sönnuðu.

Kristján Þór Magnússon, sveitastjóri Norðurþings, kynnti EIM til sögunnar og fór yfir tilurð, markmið og uppbyggingu verkefnisins. Hann benti á þau fjölmörgu tækifæri sem leyndust í sjálfbærri nýtingu auðlinda vítt og breitt um Norðurland og fór yfir þau verkefni sem EIMUR mun taka þátt í á næstunni. Hörður Arnarson, forstjóri Landsvirkjunar, fjallaði í sínu erindi um reynslu sjávarútvegs af nýsköpun og þróun síðustu áratuga og sagði raforkuiðnaðinn geta lært mikið af þeirri vegferð.

Hvað er EIMUR?

Markmið EIMS er að stuðla að aukinni sjálfbærni samfélaga með fjölbreyttari nýtingu orkuauðlinda á Norðausturlandi og samspili samfélags, umhverfis, auðlinda og efnahags. EIM er ætla að skapa jarðveg fyrir nýsköpunar- og þróunarverkefni með áherslu á verðmætasköpun í víðum skilningi, ásamt því að auka meðvitund almennings og fyrirtækja á málaflokknum.

Með virkri starfsemi á þessu sviði er framtíðarsýn verkefnisins að það muni auka getu svæðisins til að takast á við áskoranir 21. aldarinnar. Að baki verkefninu standa Orkuveita Húsavíkur, Norðurorka, Landsvirkjun og Eyþing, samtök 13 sveitarfélaga á svæðinu ásamt Íslenska ferðaklasanum, Íslenska jarðvarmaklasanum og atvinnuþróunarfélögum á svæðinu.

Bakhjarlar verkefnisins munu leggja verkefninu til 100 milljónir í stofnfé. Stofnfénu verður m.a. varið til að ráða starfsmann til verkefnisins. Þegar er hafin vinna við nokkur verkefni á vegum EIMS, m.a. munu tveir starfsmenn vinna við kortlagningu tækifæra á svæðinu í sumar, auk þess sem sérstök málstofa um nýsköpun í orkuiðnaði verður haldin á Húsavík 20. júní nk. Að auki er hafinn undirbúningur við að afla verkefninu og tengdum verkefnum meira fjármagns í gegnum innlenda og erlenda uppbyggingar- og styrktarsjóði.

Sjá nánar hér:

Facebook síða EIMS

Facebook viðburður – stofnfundur EIMS

Fréttasafn Prenta