Úthlutun úr Samfélagssjóði Landsvirkjunar á þriðja ársfjórðungi 2011
Útilífsmiðstöð skáta á Úlfljótsvatni
700.000 kr. styrkur til uppbyggingar útikennslustofu og útieldunaraðstöðu á Úlfljótsvatni er nýtist skátum og grunnskólanemum hvaðanæva af landinu.
SAFT og Heimili og skóli, landsamtök foreldra
600.000 kr. til prentunar og útgáfu námsefnis er fjallar um ábyrga notkun netsins og nýmiðla og verður dreift í alla grunnskóla landsins.
Samskiptamiðstöð heyrnarlausra og heyrnarskertra á íslandi
500.000 kr. styrkur til þróunar á námsumhverfi og þekkingarbrunni á táknmáli fyrir farsíma.
Stígamót, grasrótarhreyfing gegn kynferðisofbeldi
500.000 kr. styrkur til að kosta götukynningar og auglýsingar á átaki sem hefur það markmið að safna mánaðarlegum styrktaraðilum til starfsemi samtakanna.
Alþjóðleg kvikmyndahátíð í Reykjavík (RIFF)
500.000 kr. til alþjóðlegrar kvikmyndahátíðar sem haldin er í september ár hvert.
Tónlistarsafn Íslands
400.000 kr. til verkefnisins Íslensk tónmenning gerð lifandi. Markmiðið er að hljóðrita tónmenningu þjóðarinnar eins og hún hún birtist í varðveittum bókum allt frá 16. öld og gera hana aðgengilega almenningi í gegnum gagnagrunninn Ismus sem verður opnaður í haust.
Hlemmur – Lækjartorg, Sögusýning við Laugaveg sumar 2012
250.000 kr. til að setja upp sögusýningu á Laugavegi sem vegfarendur koma til með að njóta er þeir ganga götuna. Efnið á sýningunni verður fjölbreytt og er ætlunin að flétta saman leiki fyrir börn og fullorðna þannig að ferð á sýninguna gæti orðið skemmtileg samverustund fyrir fólk á öllum aldri.
Kammerkór Norðurlands
250.000 kr. stuðningur við starfsemi kórsins og tónlistarlíf á Norðurlandi.
Stuðningsfélag einstakra barna
120.000 kr. styrkur til stuðningsfélags barna og ungs fólks með sjaldgæfa og alvarlega sjúkdóma og fatlanir. Styrkurinn verður nýttur til að bæta félagsaðstöðu barnanna og kosta sjálfsstyrkingarnámskeið fyrir unglinga.
Blóðgjafafélag Íslands
100.000 kr. styrkur til þýðingar, staðfærslu og útgáfu á fræðsluefni fyrir unglinga um blóðgjöf. Markmiðið með útgáfunni er að vekja athygli, áhuga og árverkni ungs fólks gagnvart þörfinni fyrir gjafablóð til lækninga á Íslandi.
Ungmennasamband Austur-Húnvetninga
80.000 kr. til Héraðsmóts á Blönduósi, þar sem keppa íþróttamenn frá öllum aðildarfélögum USAH.