Kvíslaveita
Kvíslaveita er samheiti á stíflum, skurðum, botnrásum og lokuvirkjum til að veita rennsli úr ýmsum þverám Þjórsár og efsta hluta Þjórsár í Þórisvatnsmiðlun.
Kvíslaveita er samheiti á stíflum, skurðum, botnrásum og lokuvirkjum til að veita rennsli úr ýmsum þverám Þjórsár og efsta hluta Þjórsár í Þórisvatnsmiðlun.
Framkvæmdir við Kvíslaveitu hófust árið 1980 og var skipt í fimm áfanga. Fyrstu fjórum áföngunum var lokið í október árið 1985. Þá höfðu verið gerðar stíflur í farvegum Stóraverskvíslar, Svartár, Þúfuverskvíslar, Eyvindarverskvísla og Hreysiskvíslar. Við þetta mynduðust fjögur lón; Dratthalavatn, Kvíslavatn, Hreysislón, og Eyvindarlón. Öll eru þessi lón tengd saman með skurðum. Vatninu er síðan veitt í Þórisvatn en áður runnu þessar kvíslar í Þjórsá.
Í fimmta áfanga Kvíslaveitu voru upptakakvíslar Þjórsár austan Hofsjökuls stíflaðar. Við stífluna myndaðist Þjórsárlón og er vatni úr því einnig veitt um Kvíslaveitu í Þórisvatn. Þessari framkvæmd lauk haustið 1997.
Lónin í Kvíslaveitu eru fimm talsins og samtals 25 ferkílómetrar að stærð. Nyrst er Þjórsárlón, þá Hreysislón, Eyvindarlón, Kvíslavatn og Dratthalavatn. Þjórsárlón er 3,5 ferkílómetrar að stærð og í það rennur fjórðungur til þriðjungur af Þjórsá. Vatnið í Kvíslaveitu rennur í Þórisvatn og nýtist vatnið til að knýja vélar í öllum 5 aflstöðvum á Þjórsár- og Tungnaársvæðinu.
Veituleiðin er um 53 km frá stíflu í Þjórsá til ármóta við Köldukvísl. Hámarksrennsli um veituna er um 200 m3/s og árlegt heildarrennsli um 1.400 Gl að meðaltali. 14 stíflur tilheyra Kvíslaveitu og eru veituskurðirnir 5 að tölu, samtals 16,5 km að lengd.
Hjá Kvíslaveitu liggur gamla Sprengisandsleiðin sem nú kallast Kvíslaveituvegur. Yfir Þjórsárskurð hefur verið smíðuð brú til þess að þessi leið lokist ekki. Mesta umferðin fer hins vegar framhjá Versölum.