Kröflustöð

Framkvæmdir við jarðgufuvirkjun á Kröflusvæðinu hófust árið 1974 með tilraunaborunum, en borun á vinnsluholum, bygging orkuvers og framkvæmdir við 132 kV línu til Akureyrar hófust sumarið 1975. Keyptar voru tvær 30 MW vélasamstæður fyrir stöðina og hús og önnur mannvirki miðuð við þær.

Íslenska ríkið lét hanna og reisa stöðina. Í upphafi var reksturinn í höndum Kröflunefndar en Rafmagnsveitur ríkisins tóku við rekstrinum 1.janúar 1979 og þær önnuðust hann til ársloka 1985. Þá keypti Landsvirkjun Kröfluvirkjun af ríkinu og yfirtók hana til eignar og reksturs.

Fyrri vélasamstæða stöðvarinnar var gangsett í ágúst 1977 en vegna gufuskorts hófst rafmagnsframleiðsla ekki fyrr en í febrúar 1978. Í upphafi var stöðin rekin með mjög takmörkuðu afli á einni vélasamstæðu, en undanfarin ár hefur vélasamstæðan gengið með fullum afköstum nema á sumrin þegar hugað er að viðhaldi.

Í upphafi gekk á ýmsu við gufuöflun og boranir og komu jarðhræringar þar mjög við sögu. Framan af ollu þær því að tærandi kvikugas streymdi inn í jarðhitakerfið og eyðilagði fóðringar í borholum. Fyrsta eldgosið í röð 9 gosa hófst 20. desember 1975 en hinu síðasta lauk í september 1984.

Áhrif umbrota hafa farið mjög þverrandi síðan. Árið 1996 ákvað Landsvirkjun að ráðast í uppsetningu á seinni vélasamstæðu stöðvarinnar og afla gufu í þágu hennar. Með endurbættri tækni var þegar hafist handa, m.a. með skáborun og gafst sú aðferð vel. Bæði voru nýjar holur boraðar og eldri lagfærðar. Árangurinn var svo góður að nú er fyrir hendi næg gufa til að stækka Kröflustöð umfram þau 60 MW sem ráð var fyrir gert í upphafi.

Raforkuframleiðsla með seinni vélasamstæðunni hófst í nóvember 1997 með hálfum afköstum, en eftir að borun og endurbótum á gufuveitunni lauk 1999 fór Kröflustöð að starfa með tveimur vélasamstæðum og fullu 60 MW afli. Gera má ráð fyrir að þriðja vélasamstæðan verði sett upp í stöðinni á næstu árum, ef þörf reynist fyrir aukna rafmagnsframleiðslu þar.

Nánari upplýsingar um stöðina í bæklingi 

Vegakort Kröflustöðvar