Ársfundur Landsvirkjunar 2010

Kynnt var ný framtíðarsýn fyrir fyrirtækið og upplýsingar um raforkuverð bæði á Íslandi og á erlendum mörkuðum sett fram.

Hörður Arnarson forstjóri Landsvirkjunar sagði á fundinum að breytingar sem átt hefðu sér stað bæði á alþjóðlegum raforkumörkuðum og í íslensku umhverfi á undanförnum árum kölluðu eftir nýrri stefnu fyrirtækisins. Markaðsvæðing, samtenging raforkukerfa og aukin áhersla á endurnýjanlega orkugjafa hafi leitt til hækkandi raforkuverðs á erlendum mörkuðum undanfarin ár. Á Íslandi hafi hins vegar mikil uppbygging virkjana á undanförnum áratugum, takmarkaðar orkuauðlindir og nýtingarstefna stjórnvalda um vatnsafl og jarðvarma,  leitt til verulegra breytinga á starfsumhverfi Landsvirkjunar.

Hörður sagði mikilvægt á þessum tímamótum að skilgreina vel hlutverk Landsvirkjunar. Það væri í hans huga að hámarka arðsemi fyrirtækisins með ábyrgum og sjálfbærum rekstri þeirra orkulinda sem fyrirtækinu væri trúað fyrir. Þá væri það markmið Landsvirkjunar að verða leiðandi í nýtingu allra endurnýjanlegra orkugjafa á Íslandi. „Við gerum okkur grein fyrir því að við erum að vinna með takmarkaða auðlind. Við fögnum því að von er á niðurstöðum annars áfanga Rammaáætlunar og áframhaldandi uppbygging vatns- og gufuaflsvirkjana er háð nýtingarstefnu stjórnvalda. Af þessum sökum gerum við jafnframt þær kröfur til okkar að hámarka afrakstur af þessari auðlind, það er, auka arðsemi af nýtingu hennar,“ sagði Hörður.

Hörður sagðist vonast til þess að með nýju hlutverki og breytingum í áherslum fyrirtækisins væri hægt að skapa aukna sátt um starfsemi fyrirtækisins. Sú leynd sem hvílt hefði á upplýsingum um orkuverð hefði til dæmis skapað ákveðna tortryggni í garð fyrirtækisins. Aukið gegnsæi, opin umræða og aukið samstarf við hagsmunaaðila yrði vonandi til þess að auka sátt um starfsemi Landsvirkjunar.

Samanburður á orkuverði
Á fundinum voru kynntar upplýsingar um raforkuverð og samanburður á raforkuverði til heimila og til stóriðju ræddur. Fram kom að raforkuverð til heimila er lægra á Íslandi en í nágrannalöndum en að allur samanburður sé viðkvæmur fyrir gengissveiflum. Þá hafi skattar á raforku mikil áhrif á verð, en þeir eru misháir eftir löndum.

Hvað raforkuverð til stóriðju varðar, þá kom fram að þeir raforkusamningar við stóriðju sem nú eru í gildi hér á landi séu tengdir álverði og hafi í för með sér miklar sveiflur á raforkuverði. Þá sé erfitt að bera saman orkuverð til stóriðju og hins almenna markaðar, þar sem nýtingarhlutfall, magn og tímabil orkukaupa séu ólík. Af þessum sökum greiði stóriðjan lægra verð fyrir raforku frá Landsvirkjun en almennur markaður. Á tímabilinu janúar til febrúar 2010 hafi stórðjufyrirtæki að meðaltali greitt 2,5 kr fyrir hverja kWst á meðan heimili greiði 3,5 krónur fyrir kWst.
Glærusýning Harðar Arnarsonar >>

Bryndís Hlöðversdóttir, stjórnarformaður Landsvirkjunar, ræddi í ávarpi sínu þá togstreitu sem er á milli nýtingar og náttúruverndar og sagðist hún vonast til þess að ný stefna fyrirtækisins geti fetað þann milliveg sem þarf til að ná sátt um málefnið.
Hljóðupptaka af ávarpi Bryndísar Hlöðversdóttur
Ávarp Bryndísar Hlöðversdóttur >>

Steingrímur J. Sigfússon, fjármálaráðherra sagði að ríkið hefði reynst Landsvirkjun góður eigandi og bakhjarl. Ríkið hefði gert sérstakan viðbúnaðarsamning til að tryggja fyrirtækinu laust fé. Einnig hefur ríkið fallið frá því að þiggja arð af starfsemi fyrirtækisins á síðasta ári. Steingrímur fagnaði þeirri vinnu sem staðið hefur yfir við nýja stefnumótun fyrirtækisins. Einnig sagðist hann taka því fagnandi að orkuverð Landsvirkjunar til stóriðju yrði gert opinbert. Benti Steingrímur á að umhverfi orkufyrirtækja á Íslandi gæti tekið miklum breytingum á næstu árum. Minntist hann í þvi sambandi á auðlindagjald.
Hljóðupptaka af ræðu Steingríms J. Sigfússonar

Stefán Pétursson, framkvæmdastjóri fjármálasviðs Landsvirkjunar kynnti ársreikning fyrirtækisins og kom þar meðal annars fram að hagnaður Landsvirkjunar árið 2009 var 193 milljónir USD. Rekstur fyrirtækisins hefur verið ásættanlegur á árinu þrátt fyrir erfiðar ytri aðstæður. Landsvirkjun hefur tryggt fjármagn til að mæta útgjöldum til ársloka 2012. Álverð hefur mikil áhrif á afkomu og sjóðstreymi Landsvirkjunar. Hefur álverð hækkað nokkuð upp á síðkastið sem er jákvætt fyrir Landsvirkjun, en birgðastaða áls á markaði er nokkuð áhyggjuefni. Rekstrartekjur voru 299,8 milljónir USD og lækkuðu um 152 milljónir USD frá 2008. Rekstrarkostaður lækkaði úr 100 milljónum USD í 70 milljónir USD árið 2009. Efnahagsreikningurinn sýnir að eignir eru upp á 4,8 milljarða USD og skuldir 3,2 milljarða dollara. Eigið fé Landsvirkjunar var um síðustu áramót 1,5 milljarðar USD. Sjóðstreymi Landsvirkjunar sýnir að um síðustu áramót voru 197 milljónir USD í handbæru fé. Stefán sagði að helstu kennitölur úr rekstri Landsvirkjunar væru veikar. Vaxtaþekja er 2,94 og Skuldir/EBIDTA 10,4. Helstu ástæður þessarar veiku stöðu er sú að miklar fjárfestingar hafa staðið yfir síðastliðin ár. Stefán sagði að horfur til skemmri tíma væru góðar. Helstu forsendur þess eru að álverð verði áfram viðunandi og vaxtaumhverfi hagstætt.
Glærusýnig Stefáns Péturssonar >>

Senda grein