Raforkuflutningur
Einn af kostum rafmagnsins er að tiltölulega auðvelt er að flytja það frá einum stað til annars. Við flutning raforku eru ýmist notaðir jarðstrengir eða loftlínur. Loftlínurnar eru ódýrari en þykja ekki fallegar auk þess sem þær eru næmar fyrir eldingum.Við flutning rafmagns tapast ákveðið hlutfall vegna viðnáms í strengnum. Til minnka orkutap vegna varmamyndunar í leiðslum er mikilvægt að hafa strauminn í leiðslum sem minnstan þegar orka er flutt langa leið. Notaður er spennubreytir til að draga úr spennufallinu með notkun riðstraums og háspennu. Straumurinn í leiðslunum er lækkaður með því að hækka spennuna í spennistöðvum á virkjunarstað þegar rafmagnið er leitt út í háspennuvirki. Háspennunni er síðan hægt að breyta í þann spennustyrk sem á við á hverjum stað. Fyrst þegar hann fer til dreifistöðva og svo aftur þegar til neytandans er komið, en þá er spennan lækkuð niður í 230 volt.
Á Íslandi sér fyrirtækið Landsnet um að flytja rafmagn frá framleiðendum orkunnar til þeirra sem kaupa orkuna og nota í stóriðju. Landsnet flytur líka rafmagnið til almenningsveitna sem kaupa rafmagn af Landsvirkjun og selja til almennings. Þá þarf að flytja rafmagnið áfram til dreifistöðva sem fyrirtæki eins og Orkuveita Reykjavíkur og Rarik reka. Þessi fyrirtæki sjá um að dreifa rafmagni með lægri spennu til einstakra heimila og fyrirtækja.
Þegar rafmagnið er komið í rafstrengi í húsagötum er það flutt inn í húsin um jarðstrengi sem kallast er heimtaugar. Heimtaugin endar við höfuðöryggi eða höfuðrofa sem tengdur er kílóvattsstundamæli sem mælir rafmagnsnotkunina. Frá rafmagnstöflunni í íbúðarhúsum greinist húslögnin til íbúða eða herbergja