Virkjanir og aflstöðvar
Bæði vatnsaflsstöðvar og gufuaflstöðvar nýta sér hringrás vatnsins. Vatnið sem rennur í gegnum vatnsorkuverin hefur einhvern tíman fallið sem rigning eða snjókorn af himnum ofan. Ef til vill hefur snjókornið lent á jökli þar sem það hefur geymst í hundruð ára áður en það bráðnaði og fór í gegnum vélar eins stöðvarhússins. Nýtanlegur jarðhiti er einnig fólginn í úrkomu sem fellur á jörðina og leitar djúpt niður í jörðu. Þar tekur vatnið upp varma úr heitu bergi og berst síðan aftur upp á yfirborðið.