Markmið laga um mat á umhverfisáhrifum er að tryggja að áður en tekin er ákvörðun um framkvæmdir sem kunna að hafa í för með sér umtalsverð áhrif á umhverfi, náttúruauðlindir og samfélag, hafi farið fram mat á þessum atriðum.

Leitað er eftir ábendingum um það sem má betur fara og því lýst til hvaða mótvægisaðgerða verði gripið til þess að lágmarka röskun. Í matsferlinu er réttur almennings til að gera athugasemdir tryggður og stjórnvöld fá yfirsýn við ákvarðanatöku um hvort leyfa skuli framkvæmdina.

Mat á umhverfisáhrifum Kárahnjúkavirkjunar er gott dæmi um þetta. Þar réðst Landsvirkjun í einar umfangsmestu rannsóknir sem farið hafa fram á hálendinu.

Allir Íslendingar eiga rétt á að gera athugasemdir við mat á umhverfisáhrifum sérhverrar framkvæmdar. Það stuðlar að lýðræðislegri ákvarðanatöku og opinni þjóðfélagsumræðu.

Landsvirkjun birtir á vef sínum upplýsingar um þær framkvæmdir fyrirtækisins sem fara í gegnum mat á umhverfisáhrifum.

Alcoa, Þeistareykir ehf., Landsvirkjun og Landsnet hf., standa að sameiginlegu mati á umhverfisáhrifum álvers á Bakka við Húsavík, Þeistareykjavirkjunar, Kröfluvirkjunar II og háspennulína frá Kröflu og Þeistareykjum að Bakka. Fyrirhugaðar framkvæmdir eru í Norðurþingi, Þingeyjarsveit og Skútustaðahreppi.

Samkvæmt úrskurði umhverfisráðherra frá 31. júlí 2008 eru framkvæmdirnar háðar sameiginlegu mati á umhverfisáhrifum, í samræmi við 2. mgr. 5. greinar í lögum um mat á umhverfisáhrifum nr. 106/2000.  Matið nær til fjögurra ofangreindra framkvæmda.  Í frummatsskýrslu eru settar fram helstu upplýsingar um framkvæmdirnar fjórar.  Gerð er grein fyrir grunnástandi, helstu umhverfisþáttum og rannsóknum ásamt sameiginlegum umhverfisáhrifum allra framkvæmda.

Frummatsskýrslu fyrir sameiginlegt mat á umhverfisáhrifum verkefnanna fjögurra er skilað inn til Skipulagsstofnunar samhliða frummatsskýrslum fyrir Þeistareykjavirkjun, Kröfluvirkjun II, háspennulínur frá Kröflu og Þeistareykjum að Bakka og álveri á Bakka. 

Allir hafa rétt á að kynna sér frummatsskýrsluna og koma athugasemdum og fyrirspurnum á framfæri til Skipulagsstofnunar sbr. upplýsingar á heimasíðu stofnunarinnar.

Sækja frummatsskýrslu og viðauka – apríl 2010.

Frestur til að gera athugasemdir er til 14. júní 2010.

Tenglar á heimasíður viðkomandi fyrirtækja þar sem nálgast má frummatsskýrslur fyrir framkvæmdirnar fjórar eru eftirfarandi:

• Kröfluvirkjun II
• Þeistareykjavirkjun
• Háspennulínur
• Álver á Bakka