Staða miðlunarlóna Landsvirkjunar er mjög í lægri kantinum miðað við árstíma. Kalt og þurrt veður í maí gerði að verkum að bráðnun íss og snjós er síðar á ferðinni en vanalega. Ekki er ástæða til að grípa til aðgerða að sinni, segir framkvæmdastjóri hjá Landsvirkjun.
Þrátt fyrir að vatnsstaða miðlunarlóna Landsvirkjunar sé töluvert lægri en gert hafði verið ráð fyrir, er ekki ástæða til þess að hafa áhyggjur af skerðingum á framboði raforku þegar líða tekur á haustið. Þetta er mat Tinnu Traustadóttur, framkvæmdastjóra sölu- og þjónustusviðs Landsvirkjunar. „Þarna erum við háð duttlungum náttúrunnar. Auðvitað fylgjumst við með stöðunni en það eru engin hættumerki sem kalla á að við séum að grípa til ráðstafana, svo sem að spara vatn í lónum eða seinka viðhaldi,“ segir hún.
Tíðarfar í maí var einkar kalt og þurrt, en hvort tveggja verkar til hægari bráðnunar íss og snjós á hálendinu til fyllingar á uppstöðulónum vatnsaflsvirkjana Landsvirkjunar. Í Reykjavík mældist úrkoma nálægt sögulegu lágmarki og hiti í maí var 16 prósent undir langtímameðaltölum. Hitastig á Akureyri var næstum því 25 prósentum undir langtímameðaltali maímánaðar. Samkvæmt yfirliti Veðurstofu Íslands var úrkoma á landinu um 25 til 40 prósent undir langtímameðaltali.
Dapurt innrennsli í vetur
„Almennt er staða miðlunarforða undir meðallagi eftir kaldan og þurran vetur. Innrennsli í miðlunarlón Landsvirkjunar hefur verið mjög slakt í vetur. Á Þjórsársvæði og á Austurlandi hefur veturinn verið kaldur og mjög þurr og innrennsli með minnsta móti, en staðan við Blöndu hefur verið hvað skást.
Niðurdráttur miðlunarlóna hófst upp úr miðjum október og var nokkuð eindreginn allan veturinn. Í lok mars og í apríl voru nokkrar leysingar á vatnasviði Blöndu, en minna sunnan heiða. Frá byrjun maí hefur verið þurrt og kalt um allt land. Niðurdráttur í miðlunarlónum hefur verið talsverður og stöðugur. Með batnandi tíð má gera ráð fyrir einhverjum leysingum, sérstaklega fyrir austan,“ segir Tinna.
Að sögn Tinnu er megindrifkraftur vorflóðanna sá snjór sem safnast upp á hálendinu á veturna. Síðsumars hefur hiti svo jafnan hækkað nægilega mikið til að koma árvissri bráðnun jökla af stað: „Þá má búast við að hlaupi kraftur í fyllinguna en jökulbráð síðsumars er drýgsta innleggið fyrir miðlunarforða næsta vetrar. Veðurfar næstu vikur mun stýra því hvenær jöklar fara að gefa, en í venjulegu árferði nær rennsli frá þeim ekki hámarki fyrr en í ágúst,“ útskýrir hún.
Eftirspurn að aukast
Á sama tíma og tíðarfarið orsakar hægt innrennsli miðlunarlóna Landsvirkjunar, hefur eftirspurn viðskiptavina fyrirtækisins hjarnað mjög við á síðustu mánuðum eftir árið 2020, sem var einkum framan af hörmulegt fyrir raforku- og hrávöruframleiðendur. Skemmst er þess að minnast að Landsvirkjun veitti hluta stærstu viðskiptavina sinna afslætti á raforkuverði á meðan heimsmarkaðsverð á áli var einna lægst. Álverð hefur nú hækkað um hartnær 80 prósent frá því að það náði lágmarki sínu í apríl á síðasta ári.
Að sögn Tinnu eru viðskiptavinir fyrirtækisins almennt að fullnýta raforkusamninga sína og í sumum tilfellum gott betur. „Sala til gagnavera minnkaði og lækkaði hratt á síðasta ári en er að koma sterkt til baka núna og hefur aldrei verið meiri en á fyrstu fimm mánuðum þessa árs,“
Við sjáum svo líka að kísilver PCC á Bakka hefur endurræst annan tveggja ofna og vinnur nú að undirbúningi ræsingar hins ofnsins. Okkar upplýsingar eru þær að Bakki verði kominn í full afköst á þessu ári. Seinni hluta þessa árs erum við að nálgast fullselt kerfi, “ segir Tinna Traustadóttir.