Tilboð í BUD-05, upphafsverk Búðarhálsvirkjunar, opnuð

11. mars 2010

Tilboð í  „Búðarhálsvirkjun  - Upphafsverk 2010“ , samkvæmt útboðsgögnum BUD-05, dags. febrúar 2010, voru opnuð 11. mars  2010, á skrifstofu Landsvirkjunar, Háaleitisbraut 68, 103 Reykjavík.

Tilhögun við opnun tilboðanna var í samræmi við ákvæði greinar 1.15.3 um opnun á tilboðum í útboðsgögnum.

Tilboðin voru opnuð í sömu röð og þau bárust til Landsvirkjunar og nöfn bjóðenda ásamt heildarfjárhæðum tilboða lesin upp af fulltrúum Landsvirkjunar í heyranda hljóði.

Eftirfarandi tilboð bárust og voru lesin upp:

Árni Helgason ehf og verktakafélagið Glaumur ehf.	495.417.651,-
Háfell ehf	999.133.989,-
Þjótandi ehf	619.564.510,-
Ræktunarsamband Flóa og Skeiða	784.904.121,-
Íslenskir aðalverktakar	634.428.678,-
Ístak	606.645.454,-
Suðurverk	732.872.560,-

Kostnaðaráætlun kr. 806.936.229,-

Landsvirkjun mun á næstu dögum og vikum fara yfir tilboðin og gert er ráð fyrir því að skrifað verði undir verksamning fyrir lok apríl.

Verkefnið er fyrst og fremst jarðvinnuverkefni og felst í aðalatriðum í eftirfarandi verkþáttum:

• Grafa og styrkja fyrstu 100 m aðrennslisganga (skeifulaga jarðgöng), hæð um 14 m og breidd um11 m.
• Grafa og styrkja um 6 m há, 6 m breið og 110 m löng aðgöng inn í sveifluþró (skeifulaga jarðgöng).
• Fullgrafa og styrkja sveifluþró sem að hluta var grafin 2002. Þróin verður um 60 m löng og 40 m breið í botninn og um 50 m djúp þar sem hún verður dýpst.
• Grafa fyrir þrýstipípum, stöðvarhúsi og athafnasvæði við stöðvarhús, auk styrkinga.
• Grafa og styrkja um 6 m há, 4,5 m breið og 130 m löng skeifulaga jarðgöng fyrir fyrirhugaða hjáveitu Köldukvíslar ásamt tilheyrandi að- og frárennslisskurðum.

Gert er ráð fyrir að vinna við verkið sem nú er boðið út hefjist í byrjun maí 2010 og standi fram í lok nóvember 2010. Verkefnið krefst um það bil 50-70 starfsmanna á þessu tímabili.

Áætlanir Landsvirkjunar miðast við að bjóða út næsta áfanga framkvæmda við virkjunina í lok apríl/ byrjun maí nk. Framkvæmdir við þá áfanga myndu þá hefjast um áramótin 2010/2011. Sú áætlun er þó háð fjármögnun verkefnisins og að samningum um orkusölu sé lokið.

Kynning á upphafsverkum Búðarhálsvirkjunar >>

 

Fréttasafn Prenta