Frétt

Alcan á Íslandi og Landsvirkjun undirrita orkusamning

23. janúar 2003

Við stækkun álversins í Straumsvík árið 1997 varð framleiðslugeta álversins 162.000 tonn á ári og orkusamningar sem gerðir voru vegna stækkunarinnar tóku mið af því framleiðslumagni. Með auknum stöðugleika í kerrekstri, straumhækkunum í kerskálum og breyttum áherslum við stjórnun fyrirtækisins hefur framleiðslan farið langt fram úr upphaflegum áætlunum og á nýliðnu ári voru t.a.m. framleidd 173.528 tonn af áli í kerskálum Alcan á Íslandi. Framleiðslumarkmið þessa árs er 176.250 tonn, sem er tæpum 9% hærra en að var stefnt með áðurnefndri stækkun verksmiðjunnar.

Vegna þessarar framleiðsluaukningar hefur verksmiðjan í Straumsvík þurft meira rafmagn en samningar hafa kveðið á um. Landsvirkjun hefur getað útvegað nægt viðbótarrafmagn, sem rétt þykir að festa í samning nú. Til fróðleiks má geta þess að 30 MW og 261 GWh/ári samsvarar nokkurn veginn framleiðslugetu Írafossstöðvar eða hálfrar Kröfluvirkjunar og jafngildir einnig nokkurn veginn árlegri raforkunotkun á öllum Suðurnesjum.

 

Fréttasafn Prenta