Landsvirkjun

Orkurannsóknasjóður veitir styrki fyrir 58 milljónir króna

15. mars 2019
Veittir voru styrkir til 32 verkefna á sviði orkumála og rannsókna á náttúru og umhverfi.

58 milljónum króna var úthlutað úr Orkurannsóknasjóði Landsvirkjunar í ár, en í gær fór fram tólfta úthlutun sjóðsins til margvíslegra verkefna á sviði umhverfis- og orkumála.

Að þessu sinni voru veittir 32 verkefnastyrkir til orkumála og til rannsókna á náttúru og umhverfi, þar með taldar rannsóknir til notkunar vistvænna orkugjafa í samgöngum og iðnaði. Af þessum 32 styrkjum voru 11 framhaldsstyrkir.

Alls bárust  62 umsóknir um rannsóknaverkefni með samanlögðum óskum um 217 milljónir króna til verkefna á árinu 2019. Umsóknir um styrki voru þannig nærri fjórum sinnum hærri en ráðstöfunarféð og er því ljóst að margar vel hæfar umsóknir gátu ekki fengið styrk að þessu sinni.

667 milljónir á tólf árum

Á tólf starfsárum sjóðsins hefur hann veitt styrki að upphæð 667 milljónir króna. Veittur hefur verið 151 námsstyrkur og 266 styrkir til rannsóknaverkefna. Viðfangsefnin í námi og rannsóknaverkefnum skiptast nokkuð að jöfnu milli orku- og virkjunarmála og náttúru- og umhverfismála.

Um Orkurannsóknasjóð

Tilgangur sjóðsins að efla rannsóknir á sviði umhverfis- og orkumála, hvetja námsmenn til að velja sér viðfangsefni á þessu sviði, gera fjárframlög Landsvirkjunar til rannsókna skilvirkari og sýnilegri og tryggja að þær rannsóknir sem sjóðurinn styrkir samrýmist umhverfisstefnu fyrirtækisins.

Nánari upplýsingar um sjóðinn má finna hér.

Fréttasafn Prenta