Vordís Eiríksdóttir, forstöðumaður hjá Landsvirkjun, hefur verið kjörin formaður Jarðhitafélags Íslands. Guðjón H. Eggertsson, deildarstjóri hjá HS Orku, og Maryam Khodayar, ráðgjafi, voru einnig kjörin í stjórn félagsins.
Fjölnýting jarðvarmans í aðalhlutverki
Vordís er jarðeðlisfræðingur og starfar sem forstöðumaður jarðvarmadeildar. Hún tekur við formennsku af Sigurði H. Markússyni, viðskiptaþróunarstjóra hjá Landsvirkjun, sem gegnt hefur formennsku í tvö ár.
„Lífsgæðin sem nýting jarðvarmans hefur fært þjóðinni er óumdeild en ég held við séum hvergi nærri hætt, möguleikar í fjölnýtingu og nýsköpun tengdri jarðhita eru miklir og á tímum sem þessum er mikilvægt sem aldrei fyrr að styðja við áframhaldandi uppbyggingu nýsköpunarfyrirtækja í geiranum“, sagði Vordís í ávarpi til gesta á aðalfundi félagsins í gær.
„Á síðustu öld var unnið gríðarmikið starf við hagnýtingu jarðvarmans og stóð þar uppúr uppbygging hitaveitu og rafmagnsframleiðslu. Ég vona, og okkur sýnist allt stefna í að á þessari öld verði fjölnýting jarðvarmans í aðalhlutverki.“
Stjórn JHFÍ skipa að loknum aðalfundi 2020:
- Vordís Eiríksdóttir, formaður, Landsvirkjun
- Daði Þorbjörnsson, ÍSOR
- Guðjón H. Eggertsson, HS Orka
- Gunnar Gunnarsson, Orkuveita Reykjavíkur
- Lilja Tryggvadóttir, Mannvit
- Maryam Khodayar, ráðgjafi
- Sigrún Nanna Karlsdóttir, Gerosion