Beint í efniLandsvirkjun

Nýting auðlinda

Hlutverk okkar er að hámarka verðmæti þeirra endurnýjanlegu orkulinda sem fyrirtækinu er trúað fyrir, með sjálfbærni og hagkvæmni að leiðarljósi. Við vinnum stöðugt að því að bæta nýtingu auðlinda og koma í veg fyrir sóun.

Ábyrg nýting auðlinda

Hringrásarhugsun er sífellt að aukast á Íslandi enda er færsla úr línulegu hagkerfi yfir í hringrásarhagkerfi lykilþáttur í vegferðinni að kolefnishlutleysi. Tvær stoðir hringrásarhagkerfis og ábyrgrar nýtingar auðlinda eru annars vegar að lágmarka notkun auðlinda og hins vegar að viðhalda verðmætum þeirra auðlinda sem teknar eru í notkun eins lengi og mögulegt er.

Hingað til hefur almennt verið lögð áhersla á endurvinnslu úrgangs en hringrásarhagkerfið tekur til fleiri og stærri þátta. Nýleg greining (KPMG, 2023) bendir til þess að auk áherslu á endurvinnslu þurfi að leggja aukna áherslu á orkuskipti, hringrás lífmassa, vistvæna mannvirkjagerð og hringrásarneyslu. Starfsemi okkar styður við allar þessar áherslur.

Hámörkum nýtingu virkjaðra auðlinda

Við berum virðingu fyrir þeim auðlindum sem við nýtum í byggingu aflstöðvanna okkar og þeim auðlindum sem stöðvarnar nýta til orkuvinnslu.

Vönduð vinnslustýring

Við stýrum vinnslu á svæðunum þannig að nýtingin sé sem best og umhverfisáhrifin sem minnst. Sem dæmi má nefna að í jarðvarmavirkjunum stillum við vinnsluholur saman og nýtum þær undir þeim þrýstingi sem hentar framleiðslunni best. Í vatnsaflsvirkjunum er leitast við að hámarka nýtingu auðlindarinnar að teknu tilliti til umhverfissjónarmiða sem miða að því að lágmarka neikvæð umhverfisáhrif.

Á Þjórsár- og Tungnaársvæðinu rennur vatnið í gegnum sjö aflstöðvar á svæðinu á leið sinni til sjávar:

Sjálfbær nýting

Við leggjum áherslu á að nýta auðlindir á sjálfbæran hátt. Með sjálfbærri þróun er vísað til þróunar þar sem litið er til lengri tíma og snýst hún um að auka efnahagsleg verðmæti og styrkja samfélagið, jafnframt því að viðhalda gæðum náttúrunnar.

Viðkvæm jarðhitasvæði er nauðsynlegt að byggja upp í þrepum og gefa tíma til þess að bregðast við nýtingu.

Endurbótaverkefni

Við erum með sérstaka endurbótadeild sem styður beint við markmiðið um að hámarka nýtingu auðlindanna. Það felur í sér að greina tækifæri til að bæta reksturinn eins og t.d. í þeim tilvikum þar sem búnaður eða vélar eru komin á tíma. Sem dæmi má nefna að við endurnýjun á aflvél í Bjarnarflagi tvöfaldaðist orkuvinnslan (úr 2,5 MW í 5 MW) þrátt fyrir að nýta sama gufumagn og áður.

Orkuskipti

Útskipti jarðefnaeldsneytis fyrir orku úr endurnýjanlegum auðlindum skiptir sköpum í uppbyggingu hringrásarhagkerfis og vegferðinni að kolefnishlutleysi. Við vinnum raforku einungis úr endurnýjanlegum auðlindum, styðjum við orkutengda nýsköpun og vinnum með viðskiptavinum og öðrum fyrirtækjum að orkuskiptum í starfsemi þeirra.

Við vinnum einnig markvisst að orkuskiptum í eigin rekstri og ætlum að hætta að kaupa jarðefnaeldsneyti árið 2030. Aðgerðir og markmið því tengdu má finna í aðgerðaáætlun okkar í loftslags-og umhverfismálum.

Hringrás efna

Við leggjum okkur fram um að auka hringrás efna í framkvæmda- og viðhaldsverkefnum. Til að tryggja að efnin fari rétta leið vöndum við valið á móttökuaðilum. Þar vega ábyrgir starfshættir meira en kostnaður, því við viljum fullvissa okkur um að efnin sem við skilum frá okkur verði nýtt aftur og að það sé gert með ábyrgum hætti.

Við hugsum í lausnum, nýtum jarðefni sem við gröfum upp í vegagerð og landmótun, nýtum afgangs stál í ný verkefni og finnum leiðir til að koma plasti aftur í frumframleiðslu. Einnig gerum við kröfur til verktaka okkar um að flokka allan úrgang svo hægt sé að endurnýta og endurvinna eins mikið og mögulegt er.

Fyrirbyggjandi viðhald

Við leggjum okkur fram við að hámarka líftíma aflstöðva, innviða og vélbúnaðar með öflugu viðhaldi. Við lögum hluti áður en bilanir verða sem kemur í veg fyrir að ein bilun leiði af sér aðra. Þannig uppfyllum við kröfur um að vélar séu tiltækar, sem þær eru alla jafna 99% frá september til maí. Hver vél í aflstöð er tekin í viðhaldsskoðun árlega og í ítarskoðun á þriggja ára fresti og við erum með öflugt viðhaldskerfi sem heldur utan um hvaða viðhaldi þarf að sinna og hvenær.

Við erum afar stolt af árangri okkar í þessum málaflokki. Með góðu viðhaldi hefur okkur tekist að lengja líftíma véla umfram uppgefinn endingartíma framleiðenda og þannig spara fé og auðlindir. Sem dæmi er vél 1 í Kröflu búin að ganga um helmingi lengur en uppgefinn endingartími sagði til um.

Ljósafossstöð er elsta aflstöð landsins. Hún var gangsett árið 1937 og með tilkomu hennar gat fólk skipt út kolum fyrir endurnýjanlega orku í starfsemi og á heimilum.
Ljósafossstöð er elsta aflstöð landsins. Hún var gangsett árið 1937 og með tilkomu hennar gat fólk skipt út kolum fyrir endurnýjanlega orku í starfsemi og á heimilum.

Grænn rekstur

Við leggjum áherslu á grænan rekstur, vistvæn innkaup og síaukna umhverfisvitund starfsfólks. Landsvirkjun hefur lokið innleiðingu Grænna skrefa á öllum starfsstöðvum fyrirtækisins. Markmiðið er að draga úr neikvæðum umhverfisáhrifum frá skrifstofustarfsemi, auka þekkingu starfsfólks á umhverfismálum og innleiða grænan rekstur.

Græn skref

Grænu skrefin eru fimm, en inann hvers þeirra eru 20 til 40 aðgerðir sem er skipt upp í sjö flokka:

Uppfylla þarf að minnsta kosti 90% aðgerða til að standast úttekt á Grænum skrefum, sem við höfum mikinn metnað fyrir. Við vitum að umhverfisvænn vinnustaður skiptir starfsfólkið okkar máli. Grænu skrefin hjálpa okkur öllum að taka þátt, þau leiða af sér nýja þekkingu og hvetja okkur til að leita frumlegra og vistvænni lausna við bæði stór verk og smá.

Svansvottað mötuneyti

Í mötuneytum okkar á starfsstöðvum um allt land er lögð áhersla á að bjóða upp á hollan mat og um leið lágmarka umhverfisáhrif þjónustunnar. Við leitum sífellt leiða til þess að tryggja að starfsemi okkar uppfylli ströngustu umhverfiskröfur hverju sinni og sem liður í því hlaut Lónið Bistro, mötuneyti okkar á höfuðborgarsvæðinu, Svansvottun árið 2022. Vottuninni fylgir aukin áhersla á lífræn og staðbundin matvæli, alfarið umhverfisvottuð efni í almennum þrifum, aðgerðir gegn matarsóun ásamt reglulegri markmiðasetningu og fræðslu.

Flokkun úrgangs

Úrgangur er auðlind. Við leggjum okkur fram við að lágmarka þann úrgang sem fer til urðunar og hámarka það sem fer aftur inn í hringrásarhagkerfið.
Við höfum greint allan úrgang sem fer frá okkur, fylgjum eftir hvernig hann er meðhöndlaður og greinum tækifæri til úrbóta. Við flokkum úrgang sem fellur til vegna starfsemi okkar og komum til endurvinnslu eða förgunar hjá viðurkenndum aðilum.

Starfsstöðvar okkar flokka úrgang í samræmi við þá möguleika sem sorphirðufyrirtæki og viðkomandi sveitarfélög hafa. Þar sem úrræði til flokkunar eru færri, t.a.m. í minni sveitarfélögum, höfum við unnið með sorphirðunni að bættri þjónustu, sem hefur nýst samfélögunum í kring.

Spilliefni

Samkvæmt lögum og reglum ber að skila öllum spilliefnum til viðurkenndra móttökuaðila til að tryggja rétta meðhöndlun þeirra. Fyrirtæki sem sinna sorphirðu og förgun fyrir okkur eru öll með starfsleyfi frá Heilbrigðiseftirlitinu og Umhverfisstofnun.