Orkurannsóknasjóður

Tilgangur sjóðsins er að efla rannsóknir á sviði umhverfis- og orkumála og er markmið hans að veita styrki til rannsóknaverkefna á vegum háskóla, stofnana, fyrirtækja og einstaklinga. Styrkveitingar sjóðsins miða að því að gera fjárframlög Landsvirkjunar til rannsókna skilvirkari og sýnilegri, og tryggja að þær rannsóknir sem sjóðurinn styrkir samrýmist loftslags- og umhverfisstefnu Landsvirkjunar.

Eingöngu er auglýst eftir umsóknum um verkefnastyrki í flokki B, sbr. úthlutunarreglur sjóðsins. Nemendur í meistara- eða doktorsnámi eiga þess kost að sækja um verkefnisstyrk ásamt leiðbeinanda.

Áherslur úthlutunar 2026 voru eftirfarandi:

• Auðlindamat og bætt nýting auðlinda
• Viðhorf almennings og samfélagsábati orkuvinnslu
• Líffræðileg fjölbreytni og aðlögun að loftslagsbreytingum

Umsækjendur þurfa að leggja fram lýsingu á rannsóknarverkefni sínu, og rökstuðning fyrir því að verkefnið tengist markmiðum sjóðsins.

Næst verður auglýst eftir umsóknum í árslok 2026. Öllum umsóknum verður svarað og farið með þær sem trúnaðarmál. Fyrirspurnir má senda á orkurannsoknasjodur@landsvirkjun.is.