Miklar viðhaldsframkvæmdir á Mývatnssvæði

Eitt umfangsmesta viðhaldsstopp í sögu Kröflustöðvar verður í vor. Báðar vélar verða teknar úr rekstri í byrjun maí og standa framkvæmdir fram á haust, með það að markmiði að stöðin verði komin aftur í hefðbundinn rekstur í október.

Stærsta verkefnið í vélastoppinu er endurnýjun á stjórnkerfi stöðvarinnar. Núverandi kerfi er komið til ára sinna og verður skipt út fyrir sambærilegt kerfi og notað er í Þeistareykjastöð. Með þessari uppfærslu eykst rekstraröryggi stöðvarinnar til muna og rekstur stöðvanna tveggja verður skilvirkari og samræmdari.

Framkvæmdir hefjast með svokölluðu allsherjarstoppi þar sem báðar vélar verða teknar úr rekstri og gufuveitukerfi stöðvarinnar gert gufulaust. Gert er ráð fyrir að vél 1 fari aftur í prufurekstur um miðjan júlí og vél 2 um miðjan september, áður en stöðin fer aftur í fullan rekstur síðar um haustið.

Halldór Magni Sverrisson, starfsmaður á Mývatnssvæði, sýnir mikilvægustu lyklana á svæðinu.

Samhliða stjórnkerfisuppfærslunni verður ráðist í mikilvægar endurbætur á rafdreifingu stöðvarinnar, þar á meðal á 11 kV og 400 V búnaði. Slík tækifæri til umfangsmikilla endurbóta gefast sjaldan og því er lögð áhersla á að nýta samlegðaráhrif verkefnanna og nýta tímann sem best til að styrkja innviði stöðvarinnar til framtíðar.

Einnig verður haldið áfram með endurbætur á kæliturnum stöðvarinnar. Undanfarin ár hefur verið unnið markvisst að endurnýjun þeirra og nú verður sérstök áhersla lögð á burðarvirki kæliturnanna.

Viðhaldsstoppið verður jafnframt nýtt til að sinna fjölmörgum endurbóta- og viðhaldsverkefnum hjá rekstrar- og viðhaldsteymum, sem og gufuveituteymi, með það að markmiði að mæta uppsafnaðri viðhaldsþörf og bæta rekstur til lengri tíma.

Andri Karlsson og Kristján Steingrímsson stilla sér upp fyrir myndatöku.

Undirbúningur verkefnisins hefur staðið yfir um langt skeið og að framkvæmdunum koma fjölmargir aðilar, þar á meðal verktakar úr nærsamfélaginu, innlendir ráðgjafar og erlendir sérfræðingar.

Samhliða vélastoppinu verður stór hluti vinnsluholanna tekinn úr rekstri. Það þýðir að lokað verður fyrir flestar holur á svæðinu. Af þeim sökum mun vinnsla dragast verulega saman og er áætlað að hún verði um 25–30% af vinnslu í venjulegu rekstrarári. Slík minnkun á vinnslu getur haft áhrif á jarðskorpuna á svæðinu. Reikna má með að land í Kröfluöskjunni rísi um nokkra millimetra á meðan á stoppinu stendur. Jafnframt má búast við lítilsháttar aukningu í smáskjálftavirkni. Flestir skjálftar verða mjög litlir, á bilinu 0–1 stig á Richter, en einstaka skjálftar geta orðið stærri, allt að 2 stig, og gætu þá fundist í nærumhverfinu.

Suðurhlíðar Kröflu.

Þær breytingar sem búast má við á jarðskorpunni eru eðlileg viðbrögð við breyttri vinnslu úr jarðhitasvæðinu í Kröflu. Jarðskorpan á svæðinu er tiltölulega veik og bregst því hratt við breytingum, eins og fyrri mælingar hafa sýnt.

Landsvirkjun rekur net jarðskjálftamæla á svæðinu í samstarfi við ÍSOR þar sem fylgst er með skjálftavirkni í rauntíma.

Við gerum ráð fyrir að nokkurt rask verði á Þeistareykjum í sumar enda mörg spennandi verkefni í gangi og í undirbúningi.

Fjölnýtingarhús

Stefnt er að því að fyrsta bygging Landsvirkjunar á nýrri fjölnýtingarlóð sunnan við stöðvarhús Þeistareykja rísi í sumar. Framkvæmdir hefjast um leið og snjóalög leyfa. Verktakar úr nærsamfélaginu sjá um að reisa húsið fyrir Landsvirkjun. Þegar húsið verður tilbúið flytur GeoSilica inn og hefur starfsemi sína og styður þannig við nýsköpun í samfélaginu okkar.

Toppvél

Jarðvegsframkvæmdir vegna toppvélarinnar hefjast í sumar þegar grunnur fyrir toppvélarhús verður grafinn. Auk þess er stefnt að því að hefja framkvæmdir við lagnaskurð frá stöðvarhúsi áleiðis að toppvél og áfram niður að niðurrennslissvæði ásamt því að vinna við nauðsynlegar vegtengingar. Þá er einnig stefnt að uppsetningu vinnubúða á svæðinu síðsumars sem er ætlað að þjóna því starfsfólki sem mun vinna við framkvæmdir vegna toppvélarinnar.

Mögulegt er að einhverjar truflanir verði að á umferð í gegnum svæðið en við munum leggja okkur fram um að upplýsa um slíkt með fyrirvara.

Árið 2025 var ár mikilla borframkvæmda á starfsvæði jarðvarmavirkjananna í Þingeyjarsveit. Alls voru borverkefnin 12 talsins. Af þeim verkefnum ber hæst að boruð var ný vinnsluhola í Suðurhlíðum við Kröflu. Þetta er fyrsta vinnsluholan sem boruð er í Kröflu frá 2016 eða í tæp 10 ár. Holunni var hleypt upp í febrúar og nú standa yfir rannsóknir áður en hægt verður að tengja hana við kerfið og nýta sem vinnsluholu.

Nýjasta vinnsluholan í Kröflu var boruð með jarðbornum Sleipni.

Aðrar holur sem boraðar voru á árinu voru þrjár niðurrennslisholur, tvær í Kröflu og ein á Þeistareykjum, þrjár svelgholur á Þeistareykjum og vatnstöku-, eftirlits- og kjarnaholur á Þeistareykjum.

Yfir sumarið fjölgar alltaf starfsfólkinu hjá okkur. Núna í sumar koma til starfa á Mývatnssvæði 10 sumarvinnuungmenni, þrír starfsmenn sem sinna mötuneyti og ræstingum og tveir munu aðstoða auðlindaeftirlitið í rannsóknum á svæðinu.

Auk þess verða tveir starfsmenn sem aðstoða við umsjón framkvæmda og hafa starfsaðstöðu bæði á Mývatnssvæði og í Reykjavík. Við hlökkum til að bjóða þessa einstaklinga velkomna til okkar.

Eins og áður hefur verið tilkynnt verður gestastofan í Kröflu lokuð sumarið 2026. Þetta er gert af öryggisástæðum vegna þeirra umfangsmiklu framkvæmda sem verða á svæðinu í sumar.

Elvar Magnússon, sem gegnt hefur starfi stöðvarstjóra á Mývatnssvæði lætur af störfum núna í sumar og flyst til annarra starfa hjá Landsvirkjun. Í hans stað hefur Halldór Guðni Traustason, hátækniverkfræðingur, verið ráðinn.

Halldór Guðni er fæddur og uppalinn á Húsavík, þar sem hann býr ásamt eiginkonu og tveimur dætrum. Hann kemur til Landsvirkjunar frá PCC Bakka Silicon, þar sem hann hefur starfað frá árinu 2021.