Hvammsvirkjun
Velkomin á vef Hvammsvirkjunar!
Landsvirkjun hefur um árabil unnið að undirbúningi virkjunarinnar sem mun nýta fall Þjórsár neðan Búrfellsvirkjunar, frá Yrjaskeri rétt ofan við bæinn Haga og niður fyrir Ölmóðsey austan við Þjórsárholt.
Í fréttavakt hér fyrir neðan getur þú nálgast öll nýjustu tíðindi sem tengjast verkefninu.
Fréttavakt
Velkomin á vaktina! Hér fyrir neðan getur þú nálgast allar nýjustu fréttir og reglulegar uppfærslur um stöðu mála og framvindu verkefnisins.
Tímabundin lokun reiðleiðar um norðanvert Skarðsfjall
Vegna framkvæmda við Hvammsvirkjun hefur reiðleið um norðanverðan hluta Skarðsfjalls verið lokað. Lokunin er nauðsynleg vegna jarðvinnu og mannvirkjagerðar á framkvæmdasvæði virkjunarinnar og er ætlað að tryggja öryggi bæði vegfarenda og starfsfólks á svæðinu.
Reiðleiðin, sem um árabil hefur verið nýtt af hestamönnum og öðrum ferðalöngum, liggur nú í gegnum svæði þar sem framkvæmdir eru í fullum gangi. Af öryggisástæðum er því óhjákvæmilegt að loka leiðinni tímabundið á meðan á framkvæmdum stendur.
Á meðan lokunin varir er umferð ríðandi fólks úr suðri beint um land Hvamms 3 og þaðan með Hvammsvegi að Landvegi. Hjáleiðin er merkt og aðgengileg og hentar hestum og reiðfólki. Ferðafólki er eindregið bent á að fylgja leiðbeiningum og virða allar merkingar og öryggisskilti á svæðinu.
Sérstök ábending er hér með gefin til þeirra sem koma úr norðri um Skarfanes, að viðkomandi reiðleið inn á Skarðsfjall er nú lokuð. Því gæti verið nauðsynlegt að velja aðra leið, enda ekki fært áfram inn í virkjanasvæðið frá þeirri stefnu á meðan lokunin er í gildi.
Í nánu samstarfi við hagaðila
Lokunin verður í gildi á meðan framkvæmdir á tilgreindu svæði standa yfir. Landsvirkjun mun upplýsa um opnun leiðarinnar með góðum fyrirvara, þegar aðstæður leyfa og öryggi er tryggt. Unnið er í nánu samstarfi við sveitarfélög, landeigendur og hestamannafélög í nágrenninu með það að markmiði að lágmarka röskun á hefðbundinni umferð og útivist.
Landsvirkjun biðst forláts á þeim óþægindum sem lokunin kann að valda og þakkar sýndan skilning og gott samstarf við alla hlutaðeigandi.
Stólpi reisir vinnubúðir við Hvamm
Landsvirkjun og Stólpi hafa skrifað undir samning um gerð vinnubúða við Hvammsvirkjun.
Verkið felur í sér smíði á færanlegum vinnubúðaeiningum og undirstöðum, flutningi, uppsetningu og frágangi á einingum og undirstöðum, ásamt lagningu og tengingu lagna frá vinnubúðaeiningunum að tengipunktum veitustofna á svæðinu.
Í þessum áfanga verða reistar svefneiningar fyrir 32 manns, aðstaða fyrir heilsugæslu, mötuneyti, skrifstofu og heilsurækt. Vinnubúðirnar verða í landi Hvamms 3 við Hvammsveg í Rangárþingi ytra. Unnið hefur verið að undirbúningi við innviði á svæðinu undanfarið.
Sprengingar vegna jarðvegsvinnu
Vegna jarðvegsvinnu við undirbúning Hvammsvirkjunar má reikna með að verktakar þurfi á næstunni að sprengja berg á svæðinu. Búast má við að einhverjar sprengingar verði flesta daga í sumar, á bilinu frá kl. 8 á morgnana til kl. 19 á daginn. Sprengingar um helgar verða takmarkaðar eins og unnt er.
Framkvæmdaleyfi sveitarfélaga nær til undirbúningsverkefna af þessu tagi. Ekki verður hafist handa við neina vinnu í árfarveginum fyrr en niðurstaða fæst í dómsmáli um virkjunarleyfi.
Við biðjumst velvirðingar á því ónæði sem þessar óhjákvæmilegu sprengingar geta valdið og munum kappkosta að láta íbúa í nágrenni framkvæmdanna vita af þeim fyrirfram, eftir því sem kostur er.
Fjallað um útboðsmál á mbl.is
Morgunblaðið rakti stöðu útboðsmála vegna Hvammsvirkjunar í frétt í blaðinu sl. laugardag og vísaði þar til upplýsinga frá Ólöfu Rós Káradóttur, yfirverkefnastjóra virkjunarinnar.
Umfjöllun um kynningarfundi vegna útboðs
Vísir.is fjallaði nýverið um fundina tvo sem við héldum á Suðurlandi í síðustu viku til að kynna fyrirhugað útboð vegna gistingar á svæðinu.
Í fréttinni er rætt við Sigurgeir Björn Geirsson, yfirverkefnastjóra Búrfellslundar við Vaðöldu:
„Við höfum hingað til leyst þessa gistingu með því að vera með okkar eigin vinnubúðir og óskað eftir því að verktakar, sem eru að vinna fyrir okkur komi með búðir fyrir sitt starfsfólk en nú er umfangið bara meira og við sjáum tækifæri í því að leita til nærsamfélagsins eftir þjónustu, þar að segja að bjóða upp á gistingu í tengslum við fyrirhugaðar framkvæmdir okkar á Þjórsár- og Tungnaársvæðinu á næstu árum.“
Auglýst eftir gistikostum
Landsvirkjun þarf að útvega starfsfólki sínu og verktökum gistingu á næstu misserum og árum, í tengslum við miklar framkvæmdir á starfssvæði okkar við Búrfell. Þess vegna auglýsum við nú útboð á gistiþjónustu og boðum til kynningarfunda í Árnesi og Stracta miðvikudaginn 29. janúar.
Hugsanlegar tafir á framkvæmdum
Framkvæmdir við Hvammsvirkjun gætu tafist um ófyrirséðan tíma, í kjölfar þess að Héraðsdómur Reykjavíkur felldi virkjunarleyfi hennar úr gildi. Landsvirkjun hefur ákveðið að áfrýja dóminum og óska eftir að málið fari beint til Hæstaréttar. Þá hefur umhverfis-, orku- og loftslagsráðherra boðað frumvarp sem greiði fyrir framkvæmdum við Hvammsvirkjun og komi í veg fyrir frekari tafir. Áfram verður skýrt frá stöðunni á þessari síðu eftir því sem málum vindur fram.
Forsendur dóms Héraðsdóms Reykjavíkur hinn 15. janúar eru að Umhverfisstofnun hafi skort lagastoð til að heimila breytingu á vatnshloti Þjórsár og því geti virkjunarleyfið ekki staðið. Við innleiðingu vatnatilskipunar Evrópusambandsins hafi löggjafinn í raun gert Umhverfisstofnun ókleift að veita heimild til breytingar á vatnshloti fyrir byggingu vatnsaflsvirkjana og þar með sé ekki hægt að gefa út virkjunarleyfi.
Hvammsvirkjun verður byggð
Við hjá Landsvirkjun erum sannfærð um að Hvammsvirkjun verður byggð, enda hefur stuðningur við það á Alþingi og í samfélaginu almennt líklega aldrei verið meiri. Við höfum vandað mjög til allra verka á öllum stigum undirbúnings virkjunarinnar, sem er eflaust mest og best rannsakaða verkefni á landinu.
Áætlanir okkar gerðu ráð fyrir að hverflar Hvammsvirkjunar færu að snúast síðla árs 2029 en svo gæti farið að sú dagsetning standist ekki. Seinkun verkefnisins mun hafa mjög neikvæðar afleiðingar fyrir vöxt og viðgang samfélagsins, enda er staðan í raforkukerfinu þegar orðin mjög þröng og þar mun enn herða að á næstu árum.
Landsvirkjun áfrýjar dómi héraðsdóms
Landsvirkjun hefur ákveðið að áfrýja dómi Héraðsdóms Reykjavíkur frá 15. janúar sl. þar sem virkjunarleyfi Hvammsvirkjunar var fellt úr gildi og óska eftir því að málið fari beint til Hæstaréttar.
Héraðsdómur fellir virkjunarleyfi úr gildi
Héraðsdómur Reykjavíkur úrskurðaði í dag að virkjunarleyfi Hvammsvirkjunar skyldi fellt úr gildi. Dómarinn telur að Umhverfisstofnun hafi skort lagastoð til að heimila breytingu á vatnshloti og því geti virkjunarleyfið ekki staðið.
Rafdreifistöð sett upp
Á dögunum var sett upp rafdreifistöð á vinnubúðasvæðið við Hvamm - í köldu en fallegu veðri.
Hreinn Hjartarson verkefnisstjóri hjá nýframkvæmdum var með drónann á lofti og smellti af:
Fossvélar hefjast handa við Hvammsvirkjun
Landsvirkjun og Fossvélar ehf. á Selfossi hafa samið um framkvæmdir vegna Hvammsvirkjunar. Fossvélar munu m.a. leggja veg að væntanlegu stöðvarhúsi og undirbúa plan undir vinnubúðir. Í þessum verkum felst upphaf eiginlegra virkjunarframkvæmda á svæðinu, en öll leyfi voru í höfn í lok október.
Yfirgripsmikil grein um framkvæmdaverkefni
Það er óhætt að mæla með lestri greinarinnar hér fyrir neðan. Hún birtist í fjölmiðlum í vikunni, en í henni er farið yfir allar framkvæmdir sem framundan eru hjá okkur á Suðurlandi.
Þar kemur meðal annars fram að þegar mest verður að gera í Hvammsvirkjun, Búrfellslundi og Sigöldu verða 650 manns á verkstað!
Ærin verkefni næstu ár
Grein eftir Ásbjörgu Kristinsdóttur, framkvæmdastjóra Framkvæmda hjá Landsvirkjun, um þau viðamiklu verkefni sem framundan eru á Suðurlandi.
Kynningarfundir í Árnesi og Landhóteli
Landsvirkjun og Vegagerðin héldu kynningarfundi fyrir íbúa Rangárþings ytra og Skeiða- og Gnúpverjahrepps síðastliðinn þriðjudag og miðvikudag. Þar sögðu fulltrúar Landsvirkjunar og Vegagerðarinnar frá framkvæmdum sem framundan eru í tengslum við byggingu Hvammsvirkjunar og Búrfellslundar við Vaðöldu. Fundirnir voru vel sóttir og margt skrafað í kaffispjalli eftir þá.
Framkvæmdamolar í nóvember
Á þessu ári hefur verið unnið við ýmsar verklegar framkvæmdir vegna undirbúnings Hvammsvirkjunar. Sigurður Óli Guðmundsson, verkefnisstjóri hjá Nýframkvæmdum, fer yfir það helsta:
Endurbætur á núverandi Hvammsvegi
Í sumar vann Vegagerðin í samvinnu við Landsvirkjun að endurbótum á núverandi Hvammsvegi, frá Landsvegi og að lóðarmörkum við Hvamm 1, alls um tæpilega 3 km langan vegkafla. Var vegurinn breikkaður lítillega, styrktar- og burðalag endurnýjað og vegurinn lagður klæðningu. Lauk framkvæmdinni á haustmánuðum og var verktaki Þjótandi.
Útjöfnun og upphaf á akstri í vinnubúðapúða Landsvirkjunar í Hvammi 3
Vinnubúðir Hvammsvirkjunar verða í landi Hvamms 3, sem er jörð í eigu Landsvirkjunar. Búðirnar verða á tæplega 5 ha svæði. Þar munu búa um 400 einstaklingar þegar mest lætur. Vinnubúðapúðinn hefur verið jafnaður og keyrt í hann um 30.000 rúmmetrum af efni nú í haust, verkið verður svo klárað í verkinu HVM-01, Vegagerð, efnisvinnsla og lagnir sem nýlega var boðið út. Verktakar sem unnu að þessu voru Landefni, Þjótandi og VBF-Mjölnir.
Lagning vatnsveitu fyrir vinnubúðir í Hvammi 3
Í tengslum við fyrirhugaðar vinnubúðir þarf að afla neyslu- og brunavatns. Á síðasta ári voru boraðar tvær vatnsholur í landi Hvamms 3 og nú er verið að leggja vatnsveitu og setja upp birgðatanka. Er verkið að klárast þessa dagana. Verktaki er Berg verktakar.
Skrifstofuaðstaða og endurbætur á núverandi íbúðarhúsnæði í Hvammi 3
Útbúin hefur verið skrifstofuaðstaða í gömlum sumarbústað í landi Hvamms 3, var hann endurnýjaður að innan og breytt þannig að þar eru nú 4 starfsstöðvar auk fundarrýmis. Þá eru hafnar endurbætur á íbúðarhúsinu í Hvammi 3 þannig að hægt verði að nota það fyrir starfsfólk á framkvæmdartíma. Verktakar sem unnið hafa við þetta eru Tré og Straumur og Fjórir Naglar.
Rif og tiltekt í Hvammi 3
Farið var í mikla hreinsun og tiltekt á jörð Landsvirkjunar í landi Hvamms 3. Verktaki var Egill Jóhannsson.
Girðingarvinna
Unnið hefur verið að endurnýjun á ýmsum girðingum sem tengjast okkar verkefnum og fylgir þegar gerðum samningum. Ýmsir verktakar hafa komið að þessari vinnu.
Raf- og fjarskiptavæðing
Unnið hefur verið að raf- og fjarskiptavæðingu fyrir svæðið um tíma. Rarik hefur lagt rafstreng frá aðveitustöð á Hellu að vinnubúðasvæði og verið er að leggja rafstrengi inn að vinnubúðum og áfram inn á virkjanasvæði. Auk þessa eru lagðar raf- og fjarskiptalagnir frá Búrfelli og niður að Hvammi sem einnig mun þjóna framkvæmdinni og stöðinni til frambúðar. Áætlað er að sú vinna klárist á næstu mánuðum. Verktakar sem unnið hafa við þetta eru Orkufjarskipti, Þjótandi, Nesey og Heflun.
Látum verkin tala
Hér fyrir neðan er hægt að horfa á fróðlegt erindi sem Ásbjörg Kristinsdóttir, framkvæmdastjóri Framkvæmda, hélt á haustfundi Landsvirkjunar 30. október 2024.
Þar var farið yfir aðdraganda, umfang og skipulag þeirra viðamiklu framkvæmda sem fram undan eru næstu árin á Þjórsársvæði.
Öll leyfi í höfn!
Við birtum ánægjuleg tíðindi nú rétt áðan á vefnum okkar - sjá frétt hér fyrir neðan:
Öll leyfi fyrir Hvammsvirkjun í höfn
Sveitarstjórn Skeiða- og Gnúpverjahrepps hefur samþykkt að gefa út framkvæmdaleyfi fyrir Hvammsvirkjun í Þjórsá. Áður hafði sveitarstjórn Rangárþings ytra samþykkt framkvæmdaleyfi fyrir sitt leyti. Þar með liggja öll leyfi fyrir til að hefja virkjunarframkvæmdir.
Rangárþing ytra samþykkir framkvæmdaleyfi
Sveitarstjórn Rangárþings ytra samþykkti á fundi sínum í morgun að gefa út framkvæmdaleyfi fyrir Hvammsvirkjun. Skeiða- og Gnúpverjahreppur þarf einnig að samþykkja framkvæmdaleyfi, en vonir standa til að það verði innan skamms.
Nánar má lesa um afgreiðslu málsins í fundargerð fundarins.
Megum við hóa í þig?
Nýverið auglýstum við eftir því að komast í samband við minni fyrirtæki, einyrkja eða einstaklinga sem gætu tekið að sér ýmis tilfallandi verkefni með skömmum fyrirvara á athafnasvæði okkar á Suðurlandi. Viðbrögðin hafa verið feykigóð og margar skráningar borist - en við erum alveg til í fleiri.
Staða mála í september 2024
Vegagerðin hefur unnið að endurbótum á núverandi Hvammsvegi í sumar og styttist í að ráðist verði í lagningu nýs Búðafossvegar og -brúar. Orkustofnun gaf út virkjunarleyfi fyrir Hvammsvirkjun 12. september 2024 og þá þarf aðeins að bíða framkvæmdaleyfis frá sveitarfélögunum tveimur, Rangárþingi ytra og Skeiða- og Gnúpverjahreppi. Þegar öll leyfi eru í höfn verða gerðar breytingar á Þjórsárdalsvegi og Gnúpverjavegi þar sem hluti þessara vega fer undir lónstæði en þessar framkvæmdir hefjast væntanlega ekki fyrr en síðsumars 2025.
Þegar öll leyfismál hafa klárast mun Landsvirkjun hefja ýmsar undirbúningsframkvæmdir. Gerður verður nýr aðkomuvegur í framhaldi af núverandi Hvammsvegi, það þarf að leggja grunn að vinnubúðum og leggja veitukerfi fyrir þær og framkvæmdasvæðið allt.
Einnig verður byrjað á frárennslisskurði en efni úr honum verður m.a. nýtt í vegagerð.
Virkjunarleyfi komið í hús
Orkustofnun gaf í dag út virkjunarleyfi fyrir Hvammsvirkjun í Þjórsá. Í kjölfarið sækir Landsvirkjun um framkvæmdaleyfi til bæði Rangárþings ytra og Skeiða- og Gnúpverjahrepps, en mannvirki tengd virkjuninni verða í báðum sveitarfélögunum. Enn er stefnt að því að Hvammsvirkjun taki til starfa fyrir árslok 2028.