Beint í efniLandsvirkjun

Raforkuviðskipti

Landsvirkjun selur raforku til stórnotenda annars vegar og í heildsölu til sölufyrirtækja rafmagns hins vegar. Fyrirtækið selur ekki raforku beint til heimila eða smærri fyrirtækja.

Sala á raforku

Að jafnaði nemur árleg raforkusala Landsvirkjunar um 14 TWst.

Stórnotendur

Um 85% orkunnar eru seld til stórnotenda, þar á meðal orkusækins iðnaðar og annarrar orkusækinnar starfsemi, svo sem gagnavera og landeldis. Á meðal viðskiptavina Landsvirkjunar eru mörg af stærstu fyrirtækjum landsins sem gegna mikilvægu hlutverki í íslensku atvinnulífi og útflutningi.

Heildsölumarkaður

Landsvirkjun tekur þátt á heildsölumarkaði og selur ásamt öðrum orkufyrirtækjum raforku til sölufyrirtækja sem aftur selja það í smásölu til heimila og smærri fyrirtækja. Að jafnaði eru um 2 TWst rafmagns seldar í gegnum heildsölumarkað, eða um 15% af heildarraforkusölu Landsvirkjunar.

Raforkumarkaðir

Tvö fyrirtæki hafa leyfi til að reka skipulegan markað með raforku. Vonarskarð tók til starfa í apríl 2024 og Elma, dótturfélag Landsnets, tók til starfa í mars 2025.

Á báðum mörkuðum fara fram viðskipti á heildsölumarkaði raforku. Á markaði myndast tækifæri fyrir seljendur og kaupendur til að eiga viðskipti. Send eru inn nafnlaus kaup- og sölutilboð og ef aðilar eru ásáttir um verð verður af viðskiptum.

Á raforkumörkuðum Vonarskarðs og Elmu eru seldar mismunandi markaðsvörur, mislangt fram í tímann. Á markaði Vonarskarðs eru seldar skammtíma- og langtímavörur, en hjá Elmu einungis skammtímavörur.