Vaðölduver

Skipið EENDRACHT kom til Þorlákshafnar miðvikudaginn 8. júlí með spenni og fylgibúnað fyrir safnstöð Vaðölduvers. Spennirinn var kominn á land um kl. 12 á fimmtudag.

Flutningur frá Þorlákshöfn hófst eftir miðnætti aðfararnótt föstudagsins 10. júlí og var spennirinn kominn í Vaðölduver um kl. 9 sama morgun. Flutningurinn gekk vel, enda hafði undirbúningur verið góður og þétt samstarf milli Landsvirkjunar, ET þungaflutninga, Vegagerðarinnar, lögreglu og fleiri aðila.

Gestkvæmt var á útsýnis- og áningarstaðnum okkar við Vaðölduver um helgina. Starfsfólk Landsvirkjunar tók þar á móti áhugasömu fólki sem vildi fræðast um fyrsta vindmylluver landsins og þar eru einnig skilti með upplýsingum um vindmyllur og starfsemi okkar á svæðinu.

Spennir fyrir safnstöð Vaðölduvers er nú lagður af stað til Íslands. Skipið lagði úr höfn í Porto í Portúgal laugardaginn 4. júlí og þar með hófst sjóflutningur spennisins til landsins.

Þegar spennirinn kemur til Íslands tekur við sérhæfður landflutningur að framkvæmdasvæðinu, líkt og á við um aðrar stórar einingar sem tengjast uppbyggingu vindorkuversins. Slíkir flutningar eru vandlega undirbúnir og fara fram í samráði við flutningsaðila, Vegagerðina, lögreglu og aðra hlutaðeigandi aðila.

Flutningur spennisins er hluti af umfangsmikilli aðfangakeðju verkefnisins, þar sem stórar og þungar einingar eru fluttar sjóleiðis til Íslands og þaðan áfram á framkvæmdasvæðið við Vaðöldu.

Búist er við því að skipið komi til landsins að kvöldi miðvikudagsins 8. júlí en áætlunin getur þó tekið breytingum eftir veðri, aðstæðum á sjó og í höfnum.

Nýr útsýnis- og áningarstaður við Vaðölduver verður opnaður föstudaginn 3. júlí. Frá honum er gott útsýni yfir framkvæmdasvæðið auk þess sem þar eru skilti með fróðleik um vindorku og Vaðölduver.

Starfsfólk Landsvirkjunar ætlar að vera á staðnum kl. 11-15 dagana 3.-5. júlí, taka á móti gestum og svara spurningum um framkvæmdir og næstu skref í Vaðölduveri. Öll hjartanlega velkomin!

Vinna við strenglagnir í Vaðölduveri gengur áfram samhliða öðrum framkvæmdum á svæðinu. Strengir eru komnir inn í safnstöð og RST Net hefur fengið aðgang að rafbúnaðarrými, þar sem undirbúningsvinna vegna stöðvarveitna er hafin.

Strenglagnir eru mikilvægur hluti af innviðum Vaðölduvers, enda tengja þær vindmyllurnar við safnstöðina og þaðan áfram inn í raforkukerfið. Næstu skref snúa meðal annars að frágangi, prófunum og áframhaldandi undirbúningi fyrir spennusetningu.

Framkvæmdir við undirstöður vindmylla í Vaðölduveri miða vel áfram. Nú er búið að steypa 17 undirstöður af þeim 28 sem fyrirhugaðar eru.

Undirstöðurnar eru umfangsmikil mannvirki sem mynda grunninn fyrir vindmyllurnar sjálfar. Þegar steypuvinnu og frágangi lýkur tekur við undirbúningur fyrir uppsetningu turna og annarra eininga. Verkið er unnið í áföngum og í takt við framvindu annarra framkvæmda á svæðinu.

Nú eru tvær vindmyllur fulluppsettar og sú þriðja langt komin, en aðeins vantar einn spaða á hana. Gangi áætlanir dagsins eftir verður hann settur upp á næsta sólahring og þá verða þrjár vindmyllur komnar upp á framkvæmdasvæðinu.

Samhliða er vinna við fjórðu vindmylluna komin vel á veg og er hún um 80% uppsett. Veður ræður miklu um framvinduna, sérstaklega þegar kemur að hífingum, en þegar aðstæður leyfa gengur verkið hratt og vel fyrir sig.

Samsetningu annarrar vindmyllunnar í Vaðölduveri er nú lokið, 3. júní 2026. Verkið tók sex daga, en til samanburðar tók tíu daga að setja fyrstu vindmylluna saman að fullu.

Veður hefur verið hagstætt til hífinga á framkvæmdasvæðinu undanfarna daga og hefur það stutt vel við framgang verksins. Uppsetning vindmyllnanna gengur vel.

ENERCON E-Ship 1 kom til Þorlákshafnar í morgun með íhluti í fjórar vindmyllur fyrir Vaðölduver. Skipið er sérstaklega hannað til flutninga á stórum vindmylluhlutum og nýtir fjóra Flettner-rótora á þilfari til að aðstoða við siglinguna.

Flutningar á vindmylluhlutum hafa staðið yfir frá byrjun maí og ganga vel. Fyrstu vindmyllurnar eru nú að rísa og gert er ráð fyrir að fyrri fjórtán þeirra fari að vinna raforku inn á flutningskerfið í haust.

Ístak fjallar á vef sínum um góðan áfanga í framkvæmdum við Vaðölduver. Miðvikudaginn 13. maí voru holplötur hífðar á stærsta spennarými safnstöðvarhússins og er þar með komið þak á allt húsið.

Landsvirkjun hefur auglýst nýtt starf vegna Vaðölduvers, fyrsta vindorkuvers Íslands. Leitað er að öflugum einstaklingi til að hafa umsjón með rekstri og viðhaldi innviða versins og taka þátt í að byggja upp þekkingu og verklag í nýjum hluta orkukerfisins.

Starfið snýr meðal annars að uppbyggingu viðhaldsáætlana, ástandseftirliti, viðbrögðum við bilunum og samhæfingu við þjónustuaðila vindmyllanna. Viðkomandi mun jafnframt vinna að auknu rekstraröryggi, endingu búnaðar og hagkvæmni í rekstri. Starfsstöðin verður til að byrja með á framkvæmdasvæði Vaðölduvers en síðar í þjónustuhúsi Landsvirkjunar á Hellu, sem áformað er að opna haustið 2027.

Um er að ræða fullt starf fyrir einstakling með reynslu af viðhaldsstýringu og menntun á sviði verkfræði, tæknifræði, vélstjórnar, rafvirkjunar eða skyldra greina. Umsóknarfrestur er til 26. maí.

Sjónvarp RÚV fjallaði um fyrstu flutninga vindmylluhluta fyrir Vaðölduver, sem fóru fram aðfaranótt 7. maí. Í fréttinni var tekið viðtal við Sigurgeir Björn Geirsson, yfirverkefnastjóra Vaðölduvers, skömmu áður en fyrsti flutningurinn lagði af stað af hafnarsvæðinu í Þorlákshöfn.

Í umfjöllun RÚV var stemningin á vettvangi einnig fönguð með myndefni, bæði á hafnarsvæðinu og á leiðinni frá Þorlákshöfn í átt að Vaðöldu.

Gunnar Aron Ólason, upplýsingafulltrúi nýframkvæmda hjá Landsvirkjun, fór í viðtal í morgunfréttum RÚV klukkan átta að morgni fimmtudagsins 7. maí vegna fyrstu flutninga vindmylluhluta fyrir Vaðölduver, sem fram fóru nóttina áður.

Í viðtalinu sagði Gunnar frá því hvernig fyrsti flutningurinn gekk, en flutningslestin lagði af stað frá Þorlákshöfn skömmu eftir miðnætti og var komin að Vaðöldu fyrir klukkan fimm um morguninn.

Gunnar fór einnig yfir það sem fram undan er, en næstu vikur verða reglulegir næturflutningar með íhluti fyrir Vaðölduver. Flutningarnir eru umfangsmiklir og byggja á víðtæku samstarfi Landsvirkjunar, lögreglu, Vegagerðarinnar, flutningsaðila og annarra sem koma að verkefninu.

Viðskiptablaðið fjallaði um fyrirhugaða skóflustunguathöfn vegna nýs þjónustuhúss á Hellu. Þjónustuhúsið rís á lóð sem Landsvirkjun fékk úthlutað við Faxaflatir 2a. Verktakafyrirtækið Alefli bauð lægst í verkið en heildarkostnaður er áætlaður um hálfur milljarður króna. Gert er ráð fyrir að húsið verði risið haustið 2027, þegar Vaðölduver verður komið í fullan rekstur.

Sigurgeir Björn Geirsson, yfirverkefnastjóri Vaðölduvers, ræddi umfang flutninganna, undirbúninginn og helstu áskoranir í viðtali í Reykjavík síðdegis á Bylgjunni 4. maí. Þar fór hann yfir hvernig flutningarnir eru skipulagðir, hvaða ráðstafanir hafa verið gerðar á leiðinni og hversu víðtækt samstarf þarf til að koma svo stórum einingum örugglega frá Þorlákshöfn að Vaðöldu.

Þriðja skipið með íhluti í vindmyllur Vaðölduvers kom til Þorlákshafnar að kvöldi sunnudags 3. maí 2026. Skipið heitir IDUNN og með því komu íhlutir í eina og hálfa vindmyllu eins og í fyrstu tveimur skipunum. Skipið verður affermt 4. maí.

Landsvirkjun vekur athygli á því að í kvöld, laugardaginn 2. maí, er áætlaður æfingaakstur án farms vegna fyrirhugaðra flutninga á vindmyllum frá Þorlákshöfn í Ölfusi að Vaðöldu í Rangárþingi ytra. Gert er ráð fyrir að lagt verði af stað frá Þorlákshöfn upp úr kl. 20:00 og að ferðin taki rúmlega fjórar klukkustundir. Ekið verður eftir fyrirhugaðri flutningsleið. Æfingaaksturinn er liður í undirbúningi fyrir raunverulega flutninga á vindmylluhlutum og er framkvæmdur til að gæta fyllsta öryggis, yfirfara verklag og tryggja að allt gangi eins vel fyrir sig og kostur er þegar flutningar hefjast.

Íbúar og vegfarendur á áhrifasvæði flutningsleiðarinnar kunna að verða varir við aksturinn. Við biðjum fólk um að sýna aðgát í nágrenni flutningslestarinnar og virða leiðbeiningar þeirra sem stýra umferð á vettvangi.

Nánari upplýsingar um flutningana má finna á www.landsvirkjun.is/flutningar

Annað skipið með vindmylluhluta fyrir Vaðölduver, Onego Rio, kom til Þorlákshafnar í hádeginu mánudaginn 27. apríl. Um er að ræða aðra sendingu vindmylluhluta til verkefnisins.

Stefnt er að því að hefja affermingu á þriðjudagsmorgun 28. apríl, með svipuðu fyrirkomulagi og við komu fyrsta skipsins.

Nýtt myndband hefur verið birt um komu fyrstu vindmylluhlutanna fyrir Vaðölduver til Þorlákshafnar. Þar sést meðal annars þegar fyrsta skipið kemur til hafnar, afferming fer fram og fyrsti vindmylluspaðinn er settur á bíl til áframhaldandi flutnings.

Morgunblaðið fjallaði 21. apríl um komu fyrstu vindmylluhlutanna til landsins fyrir Vaðölduver. Í fréttinni er rætt við Sigurgeir Björn Geirsson, yfirverkefnastjóra Vaðölduvers, og meðal annars fjallað um undirbúning flutninganna og sérhæfðan búnað sem þarf til verksins.

Fyrsta skipið með vindmylluhluta fyrir Vaðölduver kom til Þorlákshafnar 20. apríl miðdegis. Skipið, sem heitir Iðunn, siglir undir hollenskum fána og kom frá Rotterdam. Um borð eru íhlutir fyrir eina og hálfa vindmyllu. Áætlað er að afferma skipið 21. apríl og geyma íhlutina á hafnarsvæðinu þar til þeir verða fluttir upp í Vaðölduver. Fyrsti flutningur er áætlaður aðfararnótt 7. maí.

Landsvirkjun verður eigandi og rekstraraðili Vaðölduvers. Enercon sér um viðhald og ráðgjöf samkvæmt þjónustusamningi, en hefur hvorki eignaraðild né hlutdeild í arði verkefnisins.

Frá og með fimmtudeginum 9. apríl hefjast framkvæmdir á tveimur köflum á flutningsleið Vaðölduvers. Annars vegar er um að ræða viðhaldsframkvæmdir á um 800 metra kafla austast á Votmúlavegi, þar sem veginum verður lokað fyrir almenna umferð á meðan framkvæmdum stendur og hjáleið verður um Hólastekk/Suðurhóla. Hins vegar hefjast viðhaldsframkvæmdir á um 2 km kafla á Landvegi, frá Kelduholti og norður fyrir afleggjara að Holtsmúla, þar sem búast má við tímabundnum lokunum og hjáleið um Bjallaveg/Árbæjarveg. Framkvæmdirnar tengjast styrkingu flutningsleiðar fyrir komandi flutninga til Vaðölduvers og eru mikilvægur þáttur í að tryggja öryggi og bæta aðstæður á leiðinni.

Tilkynning á vef sveitarfélagsins Árborgar: Framkvæmdir á Votmúlavegi í apríl 2026 | Lokun frá Gaulverjabæjarvegi að Nýjabæ | Sveitarfélagið Árborg

Tilkynning á vef sveitarfélagsins Rangárþings ytra: Viðhald á Landvegi frá 9. apríl | Rangárþing ytra

Fréttastofa RÚV tók viðtal við Sigurgeir Björn Geirsson, yfirverkefnastjóra Vaðölduvers, um fyrirhugaða flutninga vindmylluhluta frá Þorlákshöfn að Vaðöldu. Um er að ræða einhverja umfangsmestu þungaflutninga sem ráðist hefur verið í hér á landi, en í vor verða fluttir íhlutir í 14 vindmyllur, alls um 130 kílómetra leið.

Viðtalið fór fram í tengslum við undirbúningsfund á Selfossi, þar sem farið var yfir skipulag flutninganna með þeim aðilum sem koma að verkefninu. Tilgangur fundarins var að samræma verklag, tryggja gott upplýsingaflæði og fara yfir ráðstafanir sem miða að því að flutningarnir gangi greiðlega og örugglega fyrir sig.

Landsvirkjun hefur auglýst útboð vegna byggingar þjónustuhúss að Faxaflötum 2a á Hellu. Húsið mun gegna mikilvægu hlutverki sem þjónustumiðstöð fyrir Vaðölduver. Auk starfsfólks frá vindmylluframleiðandanum Enercon mun starfsfólk Landsvirkjunar einnig hafa aðstöðu í húsinu. Byggingaráformin hafa þegar hlotið afgreiðslu hjá byggingarfulltrúa Rangárþings ytra.

Útboðsgögn voru afhent 9. mars 2026 og er skilafrestur tilboða 21. apríl 2026. Heildarstærð aðalbyggingarinnar er um 414 fermetrar en þar verður m.a. að finna skrifstofurými, fundarherbergi, kaffiaðstöðu og bílskúr. Á lóðinni, sem er 9.185 fermetrar að stærð, verður einnig lágreist 46 fermetra skýli sem skiptist í 25 fermetra hjólaskýli og 21 fermetra geymslu. Húsið mun verða Svansvottað og verða þar með annað mannvirki Landsvirkjunar sem hlýtur slíka vottun.

Gert er ráð fyrir að hægt verði að hefja framkvæmdir við byggingu hússins vorið 2026. Mannvirkið er mikilvægur þáttur í uppbyggingu innviða fyrir rekstur Vaðölduvers og mun styðja við daglega þjónustu, samvinnu og aðstöðu starfsfólks sem kemur að verkefninu.

Áfram er unnið að brúarsmíði á Landvegi ofan við Ísakot. Nú hefur burðarbitum verið komið fyrir sem tengja saman brúarstólpa og mynda burðarvirki hennar. Þá hafa forsteyptar einingar einnig verið settar upp og er brúin því farin að taka á sig skýra mynd.

Brúargerðin er hluti af vegbótaverkefni Landsvirkjunar í tengslum við fyrirhugaða flutninga á vindmyllum í Vaðölduver næsta sumar.

Fyrir jól var lokið við að steypa 10 undirstöður fyrir vindmyllur í Vaðölduveri. Steypuvinna við fyrstu undirstöðuna hófst 17. september 2025 og markaði það upphaf þessa verkþáttar á framkvæmdasvæðinu.

Veður í vetur hefur almennt verið ágætt miðað við hæð yfir sjávarmáli og það hefur hjálpað til við að skapa betri aðstæður fyrir framkvæmdir á svæðinu, sérstaklega þar sem aðgengi, jarðvegsaðstæður og vinnuaðstæður geta verið viðkvæmar fyrir úrkomu og frosti.

Ný upplýsingasíða um flutningana í Vaðölduver er komin í loftið á vef Landsvirkjunar! Þar má m.a. finna almennt yfirlit yfir flutningana, kort af flutningsleið, áætlaðar tímasetningar og vegbætur, ásamt svörum við algengum spurningum.

Tilgangurinn er að tryggja opna, skýra og tímanlega upplýsingagjöf til íbúa, vegfarenda, fyrirtækja og annarra sem gætu orðið fyrir áhrifum af flutningunum.

Þann 19. nóvember 2025 tók byggingarfulltrúi Rangárþings ytra fyrir umsókn Landsvirkjunar um byggingarleyfi til að byggja 414,7 m² þjónustuhús ásamt 24,4 m² geymslu á Hellu. Byggingaráform voru samþykkt.

Verktakar vinna nú hörðum höndum við uppsteypu undirstaðna vegna brúar yfir farveg leysingavatns, nærri Ísakoti á Landvegi. Þrifalag hefur nýlega verið steypt fyrir undirstöður en um 160 rúmmetrar af steypu voru notaðir í þann verkhluta. Á næstu dögum er áformað að steypa sökkla og plötur fyrir sjálfar undirstöðurnar. Brúargerðin er hluti af vegbótaverkefni Landsvirkjunar vegna fyrirhugaðra flutninga á vindmyllum í Vaðölduver næsta vor.

Á þessari mynd frá 2. október síðastliðnum má sjá verktakann Borgarverk við lagningu slitlags á Landveg. Verkinu miðar vel en kaflinn sem byggður verður upp er um 13 km. Nú þegar er búið að klæða um 4 km en áætlað er að vegurinn verði tilbúinn fyrir fyrirhugaða flutninga á vindmyllum í Vaðölduver næsta vor.

Nýr áfangi í uppbyggingu Vaðölduvers náðist í dag, mánudaginn 6. október 2025, þegar strenglögn hófst á svæðinu. Fyrsti strengleggurinn var lagður frá safnstöð að vindmyllu T7. Strengir eru almennt lagðir meðfram vegum innan framkvæmdasvæðisins sem auðveldar uppsetningu og tengingar milli safnstöðvar og einstakra mylla. Heildarlengd strengja frá safnstöð að vindmyllum eru um 80 kílómetrar og lengd skurða fyrir strenglagnir eru nálægt 20 kílómetrum.

Í dag, 30. september 2025, verður undirstaða steypt fyrir vindmyllu T12 í Vaðölduveri. Steypuvinnan er þegar hafin og gengur vinnan nú þegar hraðar fyrir sig en þegar fyrsta undirstaðan var steypt.

Ákveðin tímamót urðu við framkvæmdir í Vaðölduveri í vikunni þegar Ístak steypti svokallað þrifalag vegna fyrstu undirstöðunnar af þeim 28 sem byggðar verða fyrir vindmyllurnar. Um 11-14 þúsund rúmmetra af steypu þarf í þær allar.

Framkvæmdir við Vaðölduver ganga vel og von er á fyrstu vindmyllunum til landsins í vor.

Morgunblaðið fjallaði um málið eftir að Árni Sæberg, ljósmyndari blaðsins, átti leið um svæðið í vikunni.

Landsvirkjun hefur samið við Borgarverk um að byggja upp Landveg á 13 km kafla í Rangárþingi ytra. Veghlutann þarf að styrkja sérstaklega fyrir flutning efnis og búnaðar fyrir Vaðölduver, fyrsta vindorkuver landsins. Borgarverk átti lægsta tilboð í verkið, tæpar 760 milljónir kr. Framkvæmdir eru nú þegar hafnar og á þeim að vera að fullu lokið í október 2025.

Við vorum rétt í þessu að birta frétt um að vindorkuverið, sem hingað til hefur gengið undir vinnuheitinu Búrfellslundur, mun hér eftir bera heitið Vaðölduver.

Eftir að staðsetningu vindorkuversins var breytt og umfang þess minnkað teljum við ekki rétt að kenna það við Búrfell, enda er það fjall töluvert sunnar. Staðið hefur til um allnokkurn tíma að kenna vindorkuverið við Vaðöldu sem er fell nærri framkvæmdasvæðinu, en þar sem ​það var þekkt í öllu leyfisveitingaferlinu sem Búrfellslundur var ákveðið að hrófla ekki við nafninu fyrr.

Úrskurðarnefnd umhverfis- og auðlindamála hefur hafnað kröfu um að ógilda ákvörðun Orkustofnunar um að veita Landsvirkjun virkjunarleyfi vegna Búrfellslundar.

Orkustofnun veitti virkjunarleyfið í ágúst á síðasta ári, en í september kærðu samtökin Náttúrugrið þá ákvörðun og kröfðust þess að hún yrði felld úr gildi. Í niðurstöðum sínum segir meirihluti úrskurðarnefndar umhverfis- og auðlindamála að ekki yrði séð að neinir þeir annmarkar lægju fyrir sem raskað gætu gildi ákvörðunar Orkustofnunar.

Það er óhætt að mæla með lestri greinarinnar hér fyrir neðan. Hún birtist í fjölmiðlum í vikunni, en í henni er farið yfir allar framkvæmdir sem framundan eru hjá okkur á Suðurlandi.

Þar kemur meðal annars fram að þegar mest verður að gera í Búrfellslundi, Hvammsvirkjun og Sigöldu verða 650 manns á verkstað!

Úrskurðarnefnd umhverfis- og auðlindamála vísaði í gær frá kæru Skeiða- og Gnúpverjahrepps á virkjunarleyfi Búrfellslundar. Jafnframt hefur kröfu Náttúrugriða um stöðvun framkvæmda við Búrfellslund verið hafnað.

Undirbúningur að byggingu Búrfellslundar, vindorkuvers Landsvirkjunar við Vaðöldu, hefur staðið á annan áratug. Hörður Arnarson, forstjóri, hefur ritað yfirgripsmikla grein um málið sem birtist á vefnum okkar í dag - sjá hér fyrir neðan.

Við höfum samið við Landsnet um að tengja vindorkuverið í Búrfellslundi inn á raforkuflutningskerfið.

Við höfum tekið fyrstu skrefin að framkvæmdum við vindorkuverið okkar sem gengið hefur undir heitinu Búrfellslundur.

Í vindorkuverinu sem rís við Vaðöldu verða tæplega 30 vindmyllur á 18 ferkílómetra svæði og vonir standa til að spaðar þessa fyrsta vindorkuvers landsins verði farnir að snúast í lok árs 2026.

Við höfum ákveðið að auglýsa útboð á vindmyllum fyrir vindorkuver við Vaðöldu sem ber vinnuheitið Búrfellslundur. Verkefnið er boðið út með fyrirvara um leyfis- og skipulagsmál.

Hér fyrir neðan er hægt að lesa ítarlega grein um vindorkuverið sem við hyggjumst reisa við Vaðöldu. Mælum með lesningu!