Framkvæmdir

Orkustofnun gaf út virkjunarleyfi fyrir Hvammsvirkjun 12. september 2024 og sveitarfélögin tvö sem framkvæmdir ná til, Rangárþingi ytra og Skeiða- og Gnúpverjahreppur, gáfu út framkvæmdaleyfi 16. og 24. október 2024.

Héraðsdómur felldi hins vegar virkjanaleyfið úr gildi með dómi sínum 15. janúar 2025, á þeirri forsendu að Umhverfisstofnun hafi skort lagastoð til að heimila breytingu á vatnshloti Þjórsár. Alþingi setti ný lög á vormánuðum 2025. Eftir að Hæstiréttur staðfesti niðurstöðu Héraðsdóms í júlí 2025, með vísan í mistök í eldri lagasetningu, ákvað Landsvirkjun að sækja um bráðabirgðaleyfi á grundvelli nýju laganna.

Vegagerðin vann að endurbótum á núverandi Hvammsvegi sumarið 2024 og næst verður ráðist í lagningu nýs Búðafossvegar og Búðafossbrúar.

Við hjá Landsvirkjun höfum þegar hafist handa við undirbúningsframkvæmdir og höldum þeim áfram, t.d. að leggja grunn að vinnubúðum og leggja veitukerfi fyrir þær og framkvæmdasvæðið allt. Þá er lagður nýr aðkomuvegur í framhaldi af núverandi Hvammsvegi, að væntanlegu stöðvarhúsi og stíflu. Framkvæmdir innan virkjanasvæðis hófust undir lok árs 2024.

Gerðar verða breytingar á Þjórsárdalsvegi og Gnúpverjavegi þar sem hluti þessara vega fer undir lónstæði en þessar framkvæmdir hefjast væntanlega ekki fyrr en síðsumars 2025.

Sú breyting hefur orðið á, að í stað þess að miða við að aflstöðin komist í rekstur árið 2028 er núna gert ráð fyrir að reksturinn hefjist ári síðar, 2029.

Við hjá Landsvirkjun erum tilbúin að hefjast handa og vonum að hverflarnir verði farnir að snúast í Hvammsvirkjun árið 2029, samfélaginu öllu til heilla.