Framkvæmdir

Orkustofnun gaf út virkjunarleyfi fyrir Hvammsvirkjun 12. september 2024 og sveitarfélögin tvö sem framkvæmdir ná til, Rangárþingi ytra og Skeiða- og Gnúpverjahreppur, gáfu út framkvæmdaleyfi 16. og 24. október 2024.

Héraðsdómur felldi hins vegar virkjanaleyfið úr gildi með dómi sínum 15. janúar 2025, á þeirri forsendu að Umhverfisstofnun hafi skort lagastoð til að heimila breytingu á vatnshloti Þjórsár. Alþingi setti ný lög á vormánuðum 2025. Eftir að Hæstiréttur staðfesti niðurstöðu Héraðsdóms í júlí 2025, með vísan í mistök í eldri lagasetningu, ákvað Landsvirkjun að sækja um bráðabirgðaleyfi á grundvelli nýju laganna.

Þann 11. ágúst 2025 veitti Umhverfis-og orkustofnun Landsvirkjun virkjunarleyfi til bráðabirgða vegna undirbúningsframkvæmda við Hvammsvirkjun. Leyfið tekur til þeirra undirbúningsframkvæmda sem þegar voru hafnar og gildir í sex mánuði frá útgáfu.

Þann 12. desember 2025 veitti Umhverfis- og orkustofnun Landsvirkjun virkjunarleyfi fyrir Hvammsvirkjun, ásamt heimild til breytingar á vatnshlotum. Ákvörðunin hefur verið birt opinberlega á vef Umhverfis- og orkustofnunar.

Vegagerðin vann að endurbótum á núverandi Hvammsvegi sumarið 2024 og næst verður ráðist í lagningu nýs Búðafossvegar og Búðafossbrúar. Framkvæmdatími þess hluta verður í samræmi við virkjunarframkvæmdirnar sjálfar.

Lokið hefur verið við þær framkvæmdir sem heimilaðar voru á grundvelli bráðabirgðaleyfa en þær snéru að undirbúningi framkvæmdasvæðis, uppbyggingu aðstöðu og öðrum nauðsynlegum verkþáttum vegna komandi heildarframkvæmdar.

Öll lykilleyfi vegna Hvammsvirkjunar hafa nú annað hvort verið gefin út eða fyrir liggur formleg heimild til útgáfu þeirra. Umhverfis- og orkustofnun gaf út endurnýjað virkjunarleyfi fyrir Hvammsvirkjun 12. desember 2025. Með leyfinu var Landsvirkjun veitt heimild til að reisa og reka virkjunina í Rangárþingi ytra og Skeiða- og Gnúpverjahreppi, ásamt heimild til breytinga á viðkomandi vatnshlotum. Þar með getur Landsvirkjun haldið áfram með verkefnið af fullum krafti.

Framkvæmdaleyfi vegna Hvammsvirkjunar liggja fyrir hjá þeim sveitarfélögum sem framkvæmdin nær til og byggingarleyfi hafa verið gefin út vegna þeirra byggingarleyfisskildu mannvirkja sem unnið verður við 2026.

Landsvirkjun hefur nú gengið frá samningum við Fossvélar ehf. og Suðurverk hf. um gröft og jarðvinnu vegna HVM-12, jarðvinnuverks Hvammsvirkjunar. Verkið felur í sér umfangsmikla jarðvinnu á framkvæmdasvæði virkjunarinnar og markar mikilvægan áfanga í framvindu verkefnisins.

Gerðar verða breytingar á Þjórsárdalsvegi og Gnúpverjavegi þar sem hluti þessara vega fer undir lónstæði. Framkvæmdir Vegagerðarinnar við þessa vegi verða samræmdar framkvæmdum Landsvirkjunar við Hvammsvirkjun.

Sú breyting hefur orðið á, að í stað þess að miða við að aflstöðin komist í rekstur árið 2028 er núna gert ráð fyrir að reksturinn hefjist tveimur árum síðar, 2030.

Við hjá Landsvirkjun erum tilbúin að hefjast handa og vonum að hverflarnir verði farnir að snúast í Hvammsvirkjun árið 2030, samfélaginu öllu til heilla.