Landsvirkjun hefur um árabil unnið að rannsóknum og undirbúningi vindorkuvers á hraun- og sandsléttunni austan Þjórsár og á Hafinu, þar sem við rekum nú þegar tvær vindmyllur í rannsóknarskyni. Vindorkuverið hefur gengið undir vinnuheitinu Búrfellslundur og er hann fyrirhugaður á Þjórsár- og Tungnaársvæðinu, stærsta aflsvæði Landsvirkjunar, en þar eru sjö af vatnsaflsstöðvum okkar í rekstri.

Í vindorkuverinu sem rís við Vaðöldu verða tæplega 30 vindmyllur á 17 ferkílómetra svæði og vonir standa til þess að spaðar þessa fyrsta vindorkuvers landsins verði farnir að snúast í lok árs 2026.

Búrfellslundur er við Vaðöldu, neðan við Sultartangastíflu og norðan vegar F26, innan sveitarfélagsins Rangárþings ytra. Helstu innviðir sem nýtast verkefninu – háspennulínur, vegir og önnur mannvirki – eru nú þegar til staðar. Háspennulínurnar Sigöldulína 3 og Hrauneyjafosslína 1 þvera fyrirhugað framkvæmdasvæði og munu flytja rafmagn frá vindorkuverinu.

Með vindorkuverinu skapast tækifæri til að nýta samlegðaráhrif vatnsafls og vindorku á svæðinu og hámarka afrakstur af þeim orkulindum sem okkur hjá Landsvirkjun er trúað fyrir.

Síðustu tvo áratugi höfum við rannsakað veðurfar og stundað vindmælingar á svæðinu. Niðurstöður þeirra rannsókna sýna að afar hagstætt er að reka vindlund á þessu svæði. Aðliggjandi fjallgarðar skapa mjög góð skilyrði fyrir vindorkunýtingu og hönnun vindorkuversins hefur tekið mið af því til að hámarka orkuvinnsluna.

Við hönnun Búrfellslundar var lögð áhersla á að lágmarka sjónræn áhrif frá nærliggjandi áfangastöðum og ferðaleiðum.

Vindorkuverið er ekki sýnilegt frá Stöng eða Gjánni og með því að staðsetja það norðan við Sprengisandsleið (F26) og Landveg skerðist ekki útsýni að Heklu. Vindmyllurnar sjást ekki frá bílastæðinu við Háafoss og eru lítt sjáanlegar frá gatnamótum Landvegar og Landmannaleiðar.

Að mati reyndra landslagsráðgjafa hentar svæðið vel fyrir vindmyllugarð.