Um Vaðölduver

Við vinnum nú af fullum krafti af því að reisa fyrsta vindorkuver landsins á hraun- og sandsléttu við Vaðöldu austan Þjórsár, sunnan við Sultartangastíflu. Í Vaðölduveri verða reistar 28 vindmyllur frá þýska vindmylluframleiðandanum Enercon. Stefnt er á að helmingur þeirra verði gangsettur haustið 2026 og vindorkuverið verði að fullu tilbúið og komið í rekstur fyrir lok árs 2027.

Verkefnið felur í sér viðamiklar framkvæmdir, uppbyggingu og styrkingu á vegum að framkvæmdasvæðinu og einhverja umfangsmestu þungaflutninga sem fram hafa farið á Íslandi.

Vaðölduver er á stærsta aflsvæði Landsvirkjunar, Þjórsár- og Tungnaársvæðinu, þar sem nú þegar eru sjö vatnsaflsstöðvar í rekstri og sú áttunda bætist við þegar Hvammsvirkjun tekur til starfa.

Vindorkuverið er við Vaðöldu, neðan við Sultartangastíflu og norðan vegar 26, innan sveitarfélagsins Rangárþings ytra. Helstu innviðir sem nýtast verkefninu – háspennulínur, vegir og önnur mannvirki – eru nú þegar til staðar. Háspennulínurnar Sigöldulína 3 og Hrauneyjafosslína 1 þvera fyrirhugað framkvæmdasvæði og munu flytja rafmagn frá vindorkuverinu.

Með vindorkuverinu skapast tækifæri til að nýta samlegðaráhrif vatnsafls og vindorku á svæðinu og hámarka afrakstur af þeim orkulindum sem okkur hjá Landsvirkjun er trúað fyrir.

Síðustu tvo áratugi höfum við rannsakað veðurfar og stundað vindmælingar á svæðinu. Niðurstöður þeirra rannsókna sýna að afar hagstætt er að reka vindorkuver á þessu svæði. Aðliggjandi fjallgarðar skapa mjög góð skilyrði fyrir vindorkunýtingu og hönnun vindorkuversins hefur tekið mið af því til að hámarka orkuvinnsluna.

Hópar geta óskað eftir því að heimsækja framkvæmdasvæði okkar í Vaðölduveri. Ekki er hægt að verða við öllum beiðnum sem berast; það fer eftir aðstæðum og yfirstandandi verkefnum á verkstað hvort unnt sé að taka á móti hópum.